Хъæрæмирзи фурт Хъæрæбий, дан,
Дзиллитæбæл хæтунтæ ку райдæдта,
Ку райдæдта, зæгъуй, гъей!
Устур къуарæ, зæгъуй, æ фæдбæл
Цубур рæстæгмæ ку 'рæмбурд кæнуй,
Ку 'рæмбурд кæнуй, гъей!
— Дæллæрдигæй нæмæ æнахур адæмтæ
Устур тухæй цæун ку байдæдтонцæ,
Ку байдæдтонцæ, гъей!
Цæй, уоци æнахур адæмти, фæсевæд,
Цæй, нæ бæстæмæ ма суадзæн,
Цæй, ма суадзæн, гъей!
Нæ хуарз æгъдæуттæ нин байсдзæнæнцæ,
Нæ урух будуртæ дæр нин ку байсдзæнæнцæ,
Ку байсдзæнæнцæ, гъей!
Æртæ анзей дæргъци Хъæрæбий
Уони пурхгæнгæ ку фæххаттæй,
Ку фæххаттæй, гъей!
йе 'фсæдти æхсæн ибæл ку фæззиндтæй,
Ку фæззгандтæй дзурдхæсгутæ,
Дзурдхæсгутæ, гъей!
Æртæ анзи йин æ фудæзнæгтæ
Ниййахæссуни фæрæзнæ ку нæ ирдтонцæ,
Ку нæ ирдтонцæ, гъей!
Бæгъатæр Хъæрæбий ку 'рбаздæхуй,
Ку 'рбаздæхуй æртæ анзей фæсте,
Æртæ анзей фæсте, гъей!
Æ фурфæлладæй, зæгъуй, Хъæрæбий
Æртæ бони ку не 'ригъал уй, ку,
Ку не 'ригъал уй, гъей!
Уæдмæ, зæгъуй, и фудæзнæгтæмæ
Хабархæссæг ку фæууй нæхеуонтæй,
Нæхеонтæй, гъей!
Боницъæхи йбæл æ хæдзари
Æнахуртæ ку 'ртеголæ унцæ,
Ку 'ртеголæ унцæ, гъей!
Тохунтæ ибæл ку байдайунцæ
И хæдзарæн æ медæмæ,
Æ медæмæ, зæгъуй, гъей!
Æ йеу уосæ Ханати кизгæ ку адтæй.
Ханати кизгæ, дан, ку радзоруй,
Ку радзоруй, дан, гъей!
— Уо, лæгай, мæ аллифарс ку зарунцæ,
Ку зарунцæ цидазр биндзитæ,
Цидæр биндзитæ, гъей!
— Йетæ, не 'фсинæ, биндзитæ нæ 'нцæ,
Фалæ æзнæгти фæттæ 'нцæ,
Æзнæгти фæттæ, гъей!
Не 'скæнæг хуцау ин ма бакомæд,
Мæ раст уодбæл цъух ка бахаста,
Цъух ка бахаста, гъей!
Хъазауати авдез ку искæнуй,
Æргом тохмæ сæмæ ку рацæуй,
Ку рацæуй, гъей!
Сæ тургъи æмбесмæ ку рахъæртуй,
Фондзей ма си ку рамаруй,
Ку рамаруй, гъей!
Уæдта бæгъатæр Хъæрæбий
Æхуæдæг дæр ку фæммард уй,
Ку фæммард уй, гъей!
Æ фиццаг уосæ Ханауон, зæгъуй,
Уæд хуæцæнгæрзтæ ку райсуй,
Ку райсуй, зæгъуй, гъей!
Йе дæр, зæгъуй хъазауатæй
Знæгтæбæл ку стох кæнуй,
Ку стох кæнуй, гъей!
йе дæр си цалдæри ку рамаруй,
Уотемæй æ лæги размæ ку рамæлуй,
Ку рамæлуй, гъей!
Æ дуккаг уосæ ку райдайуй,
Хæтохъцихъоти Хангуассæ,
Хангуассæ, зæгъуй, гъей!
Æртиккаг гæрзтæ йе ку райсуй,
Хъазауати ку бацæуй,
Ку бацæуй, гъей!
Сæ дууемæн ци нæ бантæстæй,
Фулдæр уомæн ку бантæстæй,
Ку бантæстæй, гъей!
Уæдта йе дæр æ лæги размæ
Мæлæтдзаг цæфæй ку 'рхауй,
Мæлæтдзаг цæфæй, гъей!
Уæд, зæгъуй, Хангуассæ ку сковуй,
Ку сковуй, зæгъуй, æ зæрди бунæй,
Ку сковуй, зæгъуй, гъей!
— Хъæрæбий ку адтæй адæми сæрбæл
Æ цæргæ бонти тохæг лæг,
Тохæг лæг ку адтæй, гъей!
Æ банимодзæг, сау халонау,
Сау гъæди цæра æлгъистæй,
Æлгъистæй цæра, гъей!



«ИРОН АДÆМЫ СФÆЛДЫСТАД». Фыццаг том. Салæгаты Зоя. Орджоникидзе 1961.