Дигорæ авд сабати авд æмбурди кодтонцæ Мæцутæмæ;
Се 'мбурд адтæй унафти тухæй:
Бафони æфцæгбæл æвцæггæс ниввæрæи, нæхе гъæуай кæнуни туххæй.
Тæрсæн кæсæги Биаслантæй.
Фурæокъæдтаг-Дигор Хъабан нигъгъæр кодта:
«Сумахæн æвцæггæс ка бацæуа,
Уæхæн лæг мæммæ æрцудæй иуазæг,
Мазайраг, æ ном Бадели».
Уобæл Задæлескон Текъойти Лало загъта:
«Цæугутæ уодзæнæй,
Фал нин цæбæл ниллæудзæнæй, уой нин зæгьæ ?»
«Ракордзæнæй, зæгъгæ, хæдзаразй далис Дигорæй».
Текъойти Лало ин загъта:
«Мах хæдзарæн далис нæ бафетдзинан,
Фал ин бафетдзинан хæдзарæн гудун афæдзи-афæймæ».
Уобæл исарази æй Бадели Дигорæн.
Дигорæмæ 'йеунæг рауæнбæл алтæй æрбацæуæн Бафони æфцæг-бæл.
Йеци рауæн Бадели бакуста Дигорæн æвцæггæсæй хæдзарæн гудунбæл афæдзи-афæймæ.
Афæй ку фæиæй, уæд Дигорæбæл исдонг анз искодта,
Æма Бадели æ хæдзарæн гудун хæдзарæн далисæй райивта.
Йеци бонæй фæсдæмæ Бадели Дигори асдæу цæргæ байзадæй,
Уæд Баделиæн æртæ лæхъуæни райгурдæй:
Хъубади 'ма Туйгъан æма Абисал.
Дигорæмæ Уæрæсеæй киунугæ иссудæй:
«Йеу æртæ битдзеуи нæмæ радтетæ,
Не 'взагæй куд исахуронцæ, уотæ».
Уомæй æнахургонд адæм тарстæнцæ,
Алкедæр æ битдзеуи фесæфун æнгъалдта.
Уæд Бадели загъта:
«Æз ратдзæнæн Дигори сæрбæл ме 'ртæ битдзеуи».
'Ма Бадели ракурдта Дигорæй,
Æ бидзеутæ Дигори сæрбæл ке «фесафта», уой туххæй фæдкæ:
Басилти — хай,
Коууадзæни дæр — хай,
Хист кæнгæй дæр, кизгæ æрветгæй дæр — хай.
Уæд Баделиæн æ фурттæ Уæрæсеæй иссудæнцæ ахургондтæй
Дигори æнахурганд адæми астæумæ.
'Ма син тухæ кæнун байдæдтонцæ.
Радзырдта йæ Дзæукъаты Дзæрæхмæты фырт Цицеу, 6 февраль 1927 аз Чырыстонхъæу. Ныффыста йæ Толасты Андрей.
ЦИНИИ-йы архив, фольклор № 15, папкæ 82, ф. 333—334.
«ИРОН АДÆМЫ СФÆЛДЫСТАД». Фыццаг том.
Салæгаты Зоя. Орджоникидзе 1961.
при использовании материалов сайта, гиперссылка обязательна
