22. ЦЫРЫХЫ ФЫРТ ЦОМАХЪ

Гъæ, гъæ... гъæйт, гъæйт,
Гъæйт дын, дæ фыдæй баззади, Цырыхон хорз Цомахъ...
Цырыхаты гæнахæй боброн ратахт,
Гъæйт, гъæйт, боброн куы нæ уыд,
Фæлæ Ацынæджы фырт хорз Цомахъ уыд...
Гъæйт, гъæйт, уады æфсæдтæ Ассыйы былмæ куы бахæццæ сты.
Ассыйы былыл æфсæдтæ æрæмбырд сты.
Зæгъæгаты Сау Зæгъæг та уæд сæ хицау уыди.
Æмæ, зæгъы, Сау Зæгъæг дзуры:
«Цæйут-ма, лæппутæ, уæдæ ма уæ тырыса чи ахæсдзæни?»
Ничи сæ ницы дзуры.
Дыккаг хатт зæгъы, æмæ та — ничи;
Æртыккаг хатт куыддæр загъта —
Цомахъ бæх ныццæфтæ кодта, æмæ дзуры:
«Æз ахæсдзынæн тырыса,
Фæлæ мын уалæ Луары Гуртмазы аласа ратт;
Æз æй хæсдзынæн.
Æрластой йын æй, тырыса райста...
Хæцын байдыдтой, æмæ топпы нæмыг йæ уæраг-кæхцыл сæмбæлд.
«Гъæй, цы кодтай, Цырыхы фырт?» — «Ницы, мæнæ ме 'хтонг чысыл аскъуыди».
Мардзæ йæ 'кард уыди, тох-тох та 'йæ топп уыди...
Лæхсæнтæ — дæ фæлгæсæнтæ, цæлхнæдтæ — дæ лæбурæнтæ...
Тæнзæрдæ лæгæн зæрдæ чи 'вæрдта;
Хъæбатыр лæгмæ та лæгæй-лæгмæ чи цыди...
Дзæнæтæй хайджын уай, Цырыхон хорз Цомахъ!..



«ИРОН АДÆМЫ СФÆЛДЫСТАД». Фыццаг том. Салæгаты Зоя. Орджоникидзе 1961.