Главная > Хицæн кадджытæ > Æнамонд фендар

Æнамонд фендар


8 декабря 2010. Разместил: 00mN1ck
     Цардæнцæ лæг æма уосæ еу гъæуи. Адтæй сæмæ зæронд лæг – лæхъуæни фидæ. Адтæй ма сæмæ битдзеу, авд анзи кæбæл цудæй, уæхæн. Æндæр бæстæмæ цæун гъудæй битдзеуи фиди карз тохи фæдбæл. Рараст æй. Аци гъæумæ ба знæгтæ бурсун райдæдтонцæ. Исамайун гъудæй знæгти нихмæ федар. Исдастонцæ еу хатт, дуггаг хатт, еу къуар хатти æма син ракæлидæ. Æрæмбурд æнцæ гъæуи хестæртæ нихæсмæ. Етæ загътонцæ: «Фæдздзорæн къæсибадæг осæмæ, кæд нин ейæ хуздæр ести зæгъидæ». Æрба 'й кодтонцæ нихæсмæ, ма син загъта: «Æрæмбурд кæнетæ гъæуи сувæллæнтти. Гъæуи хестæр фехсæд дор, ма имæ сувæллæнттæй ка бараздæр уа, ой ниввæретæ дууæ дорей астæу одæгасæй æма ибæл исдасетæ. Балцимæ ка рандæй, ой фидæ адтæй гъæуи хестæр æма омæн æхсгæ æрцудæй дор. Дормæ бараздæр æй æ фуртифурт. Æгъдаумæ гæсгæ ба ин н' адтæй «нæгъ» зæгъæн. И биццеуи хъес-хъесгæнгæй дууæ дорей астæу ниввардтонцæ, иннæ дортæ ба æ фæрстæмæ 'ма и федар дасун райдæдтонцæ. Зæронд лæгæн æ зæрдæ ратудта, æ мадæ ордæмæ кæсгæй, æгъдæуттæ ин æ къахбæл хуæцгæй, исгъæла æй.
     Еци рæстæги ба бæлццон-фидæ исхъæрттæй. Хабар ку фегъуста, куд адтæй, ой, уæд хъæма исласта æма æй æ зæрди ниццавта.
     Федар ба ма нур дæр лæууй. Æма ка бацæуй, е ба, федарæй ци дони тъинггитæ хауй, етæ æнцæ мади цæсти сугтæ, уонæй исахуадуй, федарбæл ба æ къох байвæруй.

Радзырдта йæ Тотойты Афæхъо Хадзимурзы фырт, 65-аздзыд, 8 январы, 1968 азы, Дзæуджыхъæу. Ныффыста йæ Хахъийты Алетæ. Салæгаты Зояйы æмбырдгондæй.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад
Рейтинг@Mail.ru