Главная > Хицæн кадджытæ > Хæмицати Хæмици зар (Вариант)

Хæмицати Хæмици зар (Вариант)

16 декабря 2010. Разместил: 00mN1ck

(Вариант)

     Уæлæ устур Тасолтанти авд æнсувæрей фидæ Тасолтан адзали сæйгæ ку фæцæй.
     Æ йавд лæхъуæнемæн уæд йе ку бауойсат кæнуй:
     – Уæ йеунæг хуæрæ Фатъимæт-рæсугъдæн аргъ искæнун базонетæ. Дæлæ уин устур Ногъайæй сæдæ бæхи ка нæ истæра, уомæн æй ма раттетæ.
     Фатъимæт-рæсугъди уæд коргутæ куд нæ адтайдæ. Бонæ сæдæ, зæгъуй, сæдæ минæвари уæд ку бацæуидæ. Тасолтантæ сæ фиди уойсат æнæ исæнхæстгæнгæй сæ хуæри ку некæмæн дæттунцæ. Фал ке арми æфтудæй устур Ногъайæй сæдæ бæхи истæрун?
     Уалдæнги сæмæ Хæмицати минкъий Хæмиц æ минæвæрттæ бæргæ барветуй.
     Тасолтанти авд æнсувæри уомæн дзуапп уæд ку раттунцæ:
     – Мах нæ фиди уойсат нæ нийхалдзинан. Устур Ногъайæй сæдæ бæхи ка 'рбатæра, нæ йеунæг хуæри уомæй уæлдай некæмæн ратдзинан.
     Хæмиц уонтæбæрзонд æма сæргубурæй уæд ку раздæхуй. Хъæстæн рæуæг æма зæрдæн дзæбæх хуаллаг уæд ку ракæнун кодта.
     Йе 'нгæрттæ, йе 'рдхæрдтæ, йе 'мбæлттæбæл бæргæ разелуй, йесге уи мæ хæтдзæ рацæуæд, зæгъгæ. Сæ гъос имæ ку не 'рдарунцæ. Мадта æгадæй ба нæ раздæхдзæнæн, зæгъгæ, æ думæггæгтæ æ нарæг астæубæл уæд ку 'рбатохуй. Æ къуæрей бонмæ Тасолтанти тургъæмæ сæдæ бæхемæн æртæ сæ уæлдай, уотемæй сæ уæд ку баскъæруй.
     Фатъимæт-рæсугъд йе 'нсувæртæмæ уæд ку бадзоруй:
     – Ракæсетæ-ма, уæртæ уин уæ фиди уойсат кадæр исæнхæст кодта.
     – Ка уодзæнæй, уæхæн лæгигъæдгун ка разиндтæй?
     Тасолтантæ йимæ авд æнсувæремæй уæд ку рацæунцæ, сæ бæхæргъау ку 'рнимайунцæ.
      А сæдæ бæхи сæдæ 'нцæ, фал ма и'ртæ бæхи ци уодзæнæнцæ?
      Æртæ бæхемæй сæ еу уодзæнæй колдуари бæх, дуггаг ку уодзæнæй мадирвади бæх, æртиггаг ба – уæ фидæ æнгаруарзон адтæй, уомæн æнгари бæх, зæгъгæ, син сæ уæд ку 'рнимауй Хæмиц. Ци ма загътайонцæ Тасолтантæ дæр, сæ фиди уойсат син ку исæнхæст кодта.
     Хæмицати минкъий Хæмиц Фатъимæт-рæсугъди уæридадæгæнгæ уæд ку рахонуй.

Радзырдта йæ Хъараты Мырзабег, 30 июль, 1933 аз, Лескен. Ныффыста йæ Цъеуты Израил.
ЦИГСИИ-йы архив, фольклор № 20, папкæ 70, ф. 50–51.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад