Главная > Хицæн кадджытæ > Æмбалхуар Хъасболати зар

Æмбалхуар Хъасболати зар


16 декабря 2010. Разместил: 00mN1ck
(Вариант)

Уорс хонхи сæрæй ба
Арви гæрæхтау
Топпи гæрæхтæ ку цæуй, гъæй.
Етæ, зæгъгæ, ку игъустæнцæ
Дæлæ Устур Дигорæмæ.
Зæронд лæгтæ, дан,
Нихæси бадунцæ,
Ку бадес кæнунцæ,
Етæ цæй гæрæхтæ уодзæнæнцæ, зæгъгæ.
Уони астæуæй
Æмбалхуар Хъасболат
Ку рагæпп кæнуй:
– Æз æй базондзæнæн,
Нæ читгин хестæртæ.
Зонгæ ба 'й бæргæ фæккæнуй,
Етæ Гуймани топпи
Гæрæхтæ ке 'нцæ.
Ку исæййафуй
Гуймани саги марди сæргъи:
– Хуцау дин берæ раттæд, Гуйман,
Фал ами ци косис,
Ардæмæ Устур Дигори биццеутæ
Къозоти гъазгæй ку схъæртунцæ.
Уæлæ цæуæн уорс айнæги сæрмæ,
Сирдтæ бæлттæй
Кæми хæтунцæ,
Сæгтæ ба æргъæуттæй.
– Мæн фагæ ами дæр ес,
Фал кæд цæуис,
Уæд дæ еунæгæй ба
Нæ рауадздзæнæн.
Ку исхъæртунцæ
Уорс айнæги сæрмæ,
Хъасболат имæ ку бадзоруй:
– Бæндæнæй мæ æруадзæ
Дæлæ еци тæрхæгаумæ,
Æз ба рафæлгæсон идæрдтæмæ.
– Нæ дæ рауадздзæнæн, Хъасболат,
Æз дæуæй фулдæр фæййидтон,
Мæнбæл ести ку 'рцæуа,
Уæддæр фулдæр фæццардтæн –
Ку бафтауй бæндæн
Йæ астæубæл,
Ку æй æруадзуй
Дæлæ тæрхæгаумæ.
Ракæсуй,рафæлгæсуй
Идæрдтæбæл, гъей,
Фал нечи фæййинуй.
Ку исдзоруй Хъасболатмæ:
– Исмæесæ, нечи си ес.
– Есгæ ба нæбал, ей, Гуйман,
Æз дин аци бонмæ
Берæ фæббæлдтæн,
Æз дин дæ уоси
Рагæйдæр берæ ку уарзтон,
'Ма амæй æндæмæ
Мæхе ку уодзæнæй.
Æ болат кардæй бæндæн
Фæллух кæнуй,
'Ма Гуйман къæхæнæй
Ку рахауй.

Радзырдта йæ Цæголты Юри Саламаны фырт, 39-аздзыд, 5 июнь, 1972 аз, Цыкола. Фехъуыста йæ Хъыбызты Бетърейæ (90-аздзыд). Ныффыста йæ Цæголты Бэлæ.
Цæгат Ирыстоны паддзахадон университет, уырыссаг литературæйы кафедрæйы архив, 1972, № 35.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад
Рейтинг@Mail.ru