Главная > Хицæн кадджытæ > Муæлцати Артуд

Муæлцати Артуд

16 декабря 2010. Разместил: 00mN1ck

     Дигори хуæрнæг адтæй æма хуæрнæги хай исæртастонцæ.
     – Хуæрнæги хай исистан æма 'й аггаг искодтан, æртæ лæгемæй хуæздæр ка разинна, уомæн.
     Дигорæ ба загътонцæ:
     – Кæци æртæ лæги 'нцæ?
     Йетæ ба загътонцæ:
     – Уæлисон Хату, Охъазти Налой æма Муæлцон Артуд: уонæй ка хуæздæр таурæхъ æрхæсса æхе лæгигъæдæй, уомæн æй ратдзинан.
     Загътонцæ:
     – Гъи, Уæлисон Хату, – зæгъæ дæ лæгигъæдтæ!
     Ци лæгигъæдæ йимæ адтæй, уони æрдзурдта, æма Дигорæ загътонцæ:
     – Аггаг æй уомæн раттунмæ.
     – Зæгъæ, Налой, – зæгъгæ.
     Æма æ лæгигъæдтæ ку 'рдзурдта, уæдта загътонцæ:
     – Ай лæгигъæдтæ фæффулдæр æнцæ, амæн аггаг æй.
     Уæдта радæ Муæлцонмæ æрхъæрттæй, æма йе ба загъта:
     – Мæнмæ неци лæгигъæдтæ ес, фал мæхе къохæй, хурдаст ахур некумæ бацудтæн, уотемæй рæхис искодтон æма 'й уой медæгæ ниййауигътон; æрхигурдмæ ахур кæнунмæ нæ бацудтæн, уотемæй æрхи агæ искодтон æма 'й рæхисбæл ниййауигътон. Топгурд ахур дæр некумæ фæццудтæн, уотемæй топп искодтон æма цуппар саги рамардтон, мæхе конд мæсугæн сæ цуппар серайебæл ниввардтон, мæхе конд фæрæтæй ба фæццудтæн æма цуппар къудурони æркодтон æма сæ мæсуги цуппар серайебæл ниввардтон. Уонæй хуæздæр ци бакодтон?
     Муæлцон æ хуарз уоси рамардта есге цъухæй ардудæй.
     Æ марæн – фадхъæдтæ луггаг,
     Æ ласæн ба бæрзæцæггаг,
     Уобæл ба уин æмбæлуй,
     Донæй уорс Къаматæ
     Æма кæрдзинæй хъал сау Уæхъæц,
     Муггагæй исдзорун.
     Йетæ æгасæй дæр æцæг ке 'нцæ, уобæл ба мин мæ синхонти бафæрсетæ.
     – Æцæг æнцæ, – разагътонцæ æвдесæнтæ. Хуæздæри хай уомæн равардтонцæ, æма 'й Донифарс исхастонцæ сæ хæтдзæ.
     (Аци дзубанди ба фегъустон Бетанти Айдарухъæй, лезгоронæй. Муæлцон дæр лезгорон адтæй. Уонæй ба мæсуг дæр, агæ дæр (Муæлцон Артуди дугъосуг), рæхис дæр ма æгас æнцæ. Мæсуги ном дæр нæма ниййхалдæй, Муæлцати мæсуг, зæгъгæ.)

Радзырдта йæ Уадаты Кубади, 83-аздзыд, Лескены цæрæг, 1924 аз. Ныффыста йæ Дзагурти Губади, Дзæуджыхъæу.
ЦИГСИИ-йы архив, фонд Дзагурова Г.А., опись1, дело 15 «а», ф. 109–110.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад