Дигор-Хъабан уæд адтæн,
Æма Зæдæлескæмæ ку бацæуинæ,
Абисалти Елберди, дæлбунти-уæлбунтигæнгæ,
Æхе ку расаидæ,
Гъе, Дигор-Хъабан уæд адтæн!
Мæсуги сæрмæ ку исхезинæ,
Æма æ рæсугъд уосæ сау лотон* бæгæни
Хæссун ку баидаидæ,
Æма æ сау дзигкотæ мæ астæубæл ку æртохидæ,
Гъе, Дигор-Хъабан ба уæд адтæн!
Сæумæ раги мæ уорс аласабæл саргъ ку исивæрун кæнинæ,
'Ма мæ егарти хæтдзæ уордигки ку рацæуинæ
Зæрдидзæбæхæн Хъарабугъати рæзти,
'Ма мæммæ кæсунæй хуæнхаг унгæг хæдзари къæразгæй
Сæ нæуæгцуд киндзитæ 'ма кизгуттæ хаун ку баидаионцæ,
Гъе, Дигор-Хъабан уæд адтæн!
Дори хъæбæрæй мæммæ кæсунæй
Хъарабугъати киндзитæн æма кизгуттæн
Сæ дзедзетæ-еу ку исцъæх уиуонцæ,
Гъе, Дигор-Хъабан уæд адтæн!
Се уазæгдонæбæл син ку нæ банвæрсинæ,
'Ма мæ егарти бууат уоми ку искæнинæ,
'Ма мæ Хъарабугъати æфсинттæ сæ уæлнихти ку бахæссионцæ.
Гъе, Дигор-Хъабан уæд адтæн!
Сау лотон бæгæни мин хæссун ку байдаиуонцæ,
Мæ цормæ ка 'ндеуидæ,
Етæ мæ цори ку лæууиуонцæ;
Ка не 'ндеуидæ мæ цори,
Йетæ ба мæбæл медæггони кæрæдзей тонун ку баидаиуонцæ,
«Мæнбæл банвæрссæнæй»**, – зæгъгæ.
«Дæуæй бабæй ци кæнуй, уотемæй»,
Гъе, Дигор-Хъабан уæд адтæн!
'Ма уордигки ку рацæуинæ,
'Ма мин мæ егарти бууæттæ иуазæгдонæмæ
Сæ нæуæгцуд киндзитæ ма кизгуттæ
Ку æрбатомар кæнионцæ:
«Æхуæдæг хъалти арми æфтуйуй,
Фал уæддæр махæн ба æ иннæ фæууиндмæ
Æ егарти бууат нæ фагæ уодзæнæй,
Гъе, Дигор-Хъабан уæд адтæн!
Уордигки рацæугæй мин нæуæг уард метбæл
Мæ нæуæг къахдзæфтæбæл
Нивтæ кæрдун ку баидаионцæ,–
Гъе, Дигор-Хъабан ба уæд адтæн!
Уордигки рацæугæй,
Дууæ доней астæумæ* ку бацæуинæ
'Ма ку нигъгъæр кæнун кæнинæ:
«Махкемамæ**, æримбурд уотæ!» зæгъгæ.
Ка не 'рцæуидæ, уонæй ба
Лæхъуæн æма кизгæ ку ниссатар кæнинæ,
Гъе, Дигор-Хъабан уæд адтæн!
Ма кæмæй ниссатар кæнинæ,
Йетæ ба мæмæ сау лотон бæгæни ма борæ нæлфуси хæтдзæ
Корæг ку æрбацæуиуонцæ,
«Ка фæцæй, уонæн гæнæн нæбал ес», зæгъгæ,
«Фал и баизайæггæгтæ ба дæ мадæ, дæ фиди иуазæг», зæгъгæ,
Гъе, Дигор-Хъабан уæд адтæн!
Радзырдта йæ Тобойты Сандир Гуйманы фырт, 4 апрель, 1909 аз, Чырыстонхъæу. Ныффыста йæ Дзагурти Губади.
ЦИГСИИ-йы архив, фонд Дзагурова Г.А. оп.1, дело 1, ф. 22–24.
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.
при использовании материалов сайта, гиперссылка обязательна |
