(Вариант)
Уæлæ, дам, бæлас макуы ракæлæд,
Куы ракæла, уæд, дам, макуы бамбийæд
Цъæх цады дзыхъхъы дæр.
Ой, Чермены хуызæн гуырдтæ
Макуы, дам, райгуырæд.
Ой, куы, дам-иу райгуырой,
Макуы, дам, амæлæнт хъаймæты бонмæ.
Тлаттатæ байуæрстой.
Уæд Чермен уыди хæтæны,
Сау хъулгъайы сæттынмæ.
Æрбатардта иу рæгъау.
Ой, Тлаттатæ, дам, байуæрстой.
Бадти йæ мад æнкъардæй
Арты фарсмæ къонайыл.
– Цы, дам, кæныс, о, нана?
Цæуыл нынкъард дæ, – зæгъы, – нана?
– Абон не 'рвадæлтæ байуæрстой,
Дæуæн хай нæ бакодтой.
Лæг у, зæгъгæ, нæ загътой.
Æвзæрæн дæ равзæрстой.
– Хъахъхъæ, нана, мæнмæ дæр
Цæттæ мæ гал, мæ гутон.
Куы фæтæрсон не 'взæртæй,
Уæд фæхъæуон ме 'мгæрттæй,
Чермен дæр хуым бакодта
Таубийау фæрсæрдæм,
Тлаттаты бадомдта,
Тарстысты йын йæ койæ.
Зарæг азарыд Плиты Ефим Георгийы фырт, райгуырд 1895 азы. Ручъы хъæу, Дзауы район. Ныффыстой йæ Плиты Милуся æмæ Гуцæты Изетæ.
Цæгат Ирыстоны паддзахадон университет, уырыссаг литературæйы кафедрæйы архив.
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.
при использовании материалов сайта, гиперссылка обязательна |
