Уæрæйдæ 'мæ, дам, Ботас
Илалай дыл ныккæной, Тъеры фырт Ботас.
Уау, Хабæты Ботас, дам, Хабæты Ботас,
Афтæ, дам, куы дзуры:
– Цæрын, дам, мæ нал уадзынц Дæргъæвсы хъахбайтæ,
Дæргъæвсы налæттæ.
Гъемæ, зæгъы, Джергаты Къалдыммæ
Фæрсынмæ куы ссыди, фæрсынмæ куы ссыди,
Цæрын, дам, мæ нал уадзынц,
Гъемæ, дам, абырæг алидзынвæнд скодтон.
Къалдым хорз лæг уыдис
Æмæ йын ныффæнд кодта:
– Ма алидз, Ботас, ма алидз,
Абырæг хорз нæу.
Ноджыдæр та йæ куы бафæрсы Къалдымы:
– Уæдæ цы кæнон, цæрын мæ куы нал уадзынц,
Цæрын мæ куы нал уадзынц?
– Кæдæм лидзыс, Ботас, кæдæм лидзыс?
– Куырттаты коммæ, Къалдым, Куырттаты коммæ.
Уый йын афтæ куы зæгъы:
Уыдон, дам, мæнгард сты,
Уыдон, дам, дæ фæсайдзысты!
Куы нæ йæм байхъуыста мæгуыр Ботас
Хорз Къалдыммæ, куы нæ йæм байхъуыста
Æмæ Куырттаты коммæ куы афардæг и,
Куы афардæг и Куырттаты коммæ.
Гæлæу – хъæуыхицау мæнгард куы уыди
Æмæ Дзодзыккаты Гæбæйы туманæй куы балхæдта.
Шанаты уæрдон, дам, къубалыл тулы,
Уой, Дзодзыккаты Гæбæ, де ууæнк, дам,
Куы бахордтай туманы тыххæй.
Тменыхъæуы, дам, хуыргарчы сабæттаг,
Хуыргарчы сабæттаг.
Гъа, уæууæй, дам, Ботас,
Дæ иунæг сæр, дам, куы бацис Куырттаты амæттаг,
Куырттаты амæттаг,
Уой, Беслæныхъæу, дам, Зилгæйæ баззад,
Уай, Ботас, дæ иунæг мад ниугæйæ баззад.
Уай, дæ сабæттаг дзырддагæй баззад,
Уа-уæууæй, дæ иунæг бæх та дæлæ хынцæгæн баззад.
Дæргъæвсы сауджын, дам, судтæ ныккодта,
Уай, дæ цъæх цæстытæй, Ботас,
Кæд дæ сау туг ныккалдтай.
Быдтаты Гæлæу уарыны тыххæй
Æстæмтæ фæфыхта,
Хæдзарæгаты, дам, хистхор гæбæрбæрзæй Къæлæу
Куырттаты хъалтæн гæртæмттæ фæфыста
Ботасы тыххæй.
Уый кæмæн фæфыста:
Цереккаты Дзамболатæн гæртæмттæ
Фæфыста Ботасы марыны тыххæй.
Хуыскъададжы, дам, Борсейы фæндаг.
Де 'намонд сæр сафæг – Мылыхаты Цорæ.
Дæргъæвсы, дам, Кæкусмæ хуыдтон,
Дзодзыккаты Цорæйы мæнгард загъта: «Тæрхъус æй фæхуыдтон».
Огойты Иван, дам, быдуафæнтæ фæкодта,
Æмæ, дам, дыл Куырттаты хъалтæ
Марыны тыххæй уынаффæтæ фæкодтой.
Сæ уыгæрдæнты, дам, æртæ мæкъуылы.
Ботас бадзуры:
– Мæнæн, дам, баззади Дæргъæвсы астæу æртæ мæгуыры.
Азарыд æй Бежаты Мæйыр Бесæгъуыры фырт. Ныффыста йæ Цагъаты Анастасия, 27 июль, 1959 аз, Хъахъхъæдур.
ЦИГСИИ-йы архив, фольклор № 250, папкæ 117, ф. 34–36.
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.
при использовании материалов сайта, гиперссылка обязательна |
