Сæумæ раги бонивади
Къамати зæрæндтæ æримбурдæнцæ нихæси,
Æмхузонæй сæ лолтæ исасухтонцæ,
Сæ лолти хъуæцæ сæ сæри мегъау исбадтæй.
Цæлкости минкъи Гуйман сæумæ раги ракастæй,
Нихæси сæри мегъæ ку исуидта,
Уæд фæдеси рацудæй.
– Дессаг, еци мегъæ ци уодзæй, – зæгъгæ, –
Къамати нихæси сæри
Мегъæ ку некæд адтæй?
–Уæ сæумæ хуарз, къамати зæрæндтæ, дзоруй сæмæ,
Цæбæл сагъæс кæнетæ?
Уæ лолти хъуæцæ уæ сæри мегъау ку исбадтæй?
Къамати зæрæндтæ дзорунцæ:
–Коми думæги абæрегæй байдзагæй.
Будурмæ цæуæг нæбал уадзунцæ,
Нæ сабитæ судæй мæлунцæ.
Цæлкости Гуйман сæмæ дзоруй:
– Мæ сæдæ сирди еу гъæуагкин æнцæ.
Мæ уоди тæссæй сау гъæди мæ цæф сирд некæд ниууагътон,
Нур дæр мæ уоди тæссæй
Мæ сабитæ судæй мæлун нæ бауадздзæнæн.
Æ дууæ гали баефтиндзуй галуæрдуни,
Йе 'мзæрæндæ хъæрæймаг уæрдуни
Сæргъæдæбæл æрауиндзуй.
Уотемæй рарастуй Силтанухъмæ хуар ласунмæ.
Коми думæгмæ ку рахъæртуй,
Уæд над дууæ æмбеси рауй.
Унаффæ кæнун байдайуй:
–Дæлæти цæуон, паддзахи фæндаг
Идардбæл зелуй. Уæлæти цæуон, æма
Абæргутæ арæх ку æнцæ...
Цæй, сурхи къулдунбæл ниффардæг уон,
Æхсæвæ сурхи фиййаутæмæ
Мæ фусун бакæндзæнæн,
Сæумæй раги Силтанухъмæ ниццæудзæнæн.
Сæумæ раги фестуй,
Фиййаутæмæ нидздзоруй:
– Æдосæ десаги фун фæууидтон. –
– Сæумæ раги фун æнæ ахустæй нæ фæдздзурдæуй, –
Фиййаутæ ин хуæруйнаг æрбайвæрунцæ.
Фун дзорун байдайуй:
– Æдосæ уæхæн фун фæууидтон,
Цума хонхи дор зелæг нæбал адтæй.
Дессаг, еци фун ци уодзæнæй?
Æ дууæ гали баефтиндзуй
Æма Силтанухъмæ рарастуй.
Сау гъæди дзæвгарæ ку ниууайуй,
Уæд пихси бунмæ бæхти къæхтæ бауинуй.
Йе 'мзæрæндæ хъæрæймаг æхсæрæ къотæрмæ æд
Хъатара багæлдзуй.
Уалинмæ имæ абæргутæ исхъæртунцæ.
– Дæ фæндаг раст, зæронд лæг, – дзорунцæ имæ, –
Кумæ цæуи, кумæ рараст дæ?
– Силтанухъмæ цæун, мæ сабитæн хуар ласунмæ.
– Дæ галтæ рауæгъдæ кæнæ, – имæ дзорунцæ.
– 'Ма ма мæ сабитæ цæмæй фæддардзæнæн?
– Дæуæн бабæй дæ сау гъог дууæ гали низзайдзæнæй.
– Мадта сомигонд дæн,
Мæхуæдæг сæ нæ исуæгъдæ кæндзæнæн.
Абæргутæй кæстæр æргæпп кæнуй æ бæхæй,
Тæвинги баст фæууæгъдæ кæнуй хъæмайæй,
Галтæ исуæгъдæ кæнуй.
Дзоруй сæмæ Гуйман:
– Уæ хуарзæнхæй, ме 'фсой мин уагътæ,
Корæггаг æй, ма æ хецау хилæ кæндзæй.
Абæргутæ ибæл бахудтæнцæ:
– Галти сагъæс нæ кæнуй,
Фал æ 'фсой сагъæс.
Гуйман æ 'фсой исæфтауй,
Йе рагъи 'й искæнуй,
Фæстæмæ рараст уй.
Къотæрмæ ку исхъæртуй,
Æ 'фсой къотæрмæ багæлдзуй,
Æ хъæрæймаг ба йе усхъи искæнуй.
Гуйман къахæй рæуæг адтæй,
Зæрдæй нæуæг адтæй,
Сау гъæди нæдтæ дæр ин амонун нæ гъудæй.
Абæргути над галтæрæни коммæ баахæссуй,
Бæласи æнхæли федар бадæн æркæнуй.
Гуйман сæ цæгъдун байдайуй,
Дууадæсемæй ма дууæ байзайуй.
Уæд имæ абæргутæ нигъгъæр кæнунцæ:
– Ци изæд дæ, ци идауæг дæ? Ниннæ уадзæ.
Гуйман дæр сæмæ нигъгъæр кæнуй:
– Мæнæн мæ сау гъог дууæ гали ку задæй,
Сумахæн дæр бабæй уæ маддæлтæ лæхъуæнтæ низзайдзæнæнцæ, –
Уонæй дæр ма еуемæн æ фæстæмæ фæккасти
Хæтдзæ æ сæри фарс фæхаун кæнуй.
Цæлкости Гуйман æ дууæ гали фæстæмæ æ
Уæрдунбæл исефтиндзуй
Æма Силтанухъæй æ сабитæн хуар æрбаласуй.
Гъæуи адæм имæ рацудæнцæ,
Æма син зæгъуй:
– Абæреги хабар некæмибал ес, æдасæй уæ
сабитæн хуар ласунмæ фæццотæ
Æма æрбаласетæ.
Радзырдта йæ Дзагойты Тотрук, 53-аздзыд, май, 1969 аз, г.Дигора.
Ныффыста йæ Маматы Р. Салæгаты Зояйы æмбырдгондæй.
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.
при использовании материалов сайта, гиперссылка обязательна |
