Главная > Историон æмæ тохы зарджытæ > Дигор-Хъабани фурт Айдарухъи зар

Дигор-Хъабани фурт Айдарухъи зар

24 декабря 2010. Разместил: 00mN1ck

Дигор-Хъабани фурт Айдарухъ адтæй,
Далæ Кæсæгмæ ку фæццудæй,
Уæд имæ Кæсæги æлдæрттæ рацæун не 'ндиудтонцæ.
Сæ тохъосаути имæ рарвистонцæ, ма син не 'рфестæг æй.
Устур æлдар и 'фсини гъæуи цардæй,
'Ма имæ ракастæй æхуæдæг, æрæйфестæг кодта,
'Ма 'й сæ уæлнихтæ бахастонцæ æлдæрттæ,
Сæ фингитæ исестонцæ, ма ин нæуæг фингитæ ивардтонцæ.
Дзоруй сæмæ:
– Мæ хæтдзæ уи есге финги раз исбадæд!» – зæгъгæ.
'Ма си неке 'ндиудта.
Уæдта сæ еу исбадтæй æ хæтдзæ,
'Ма 'й бафарста (фæрсунæй айепп некæми ес):
– Ци изæд дæ, ци идауæг дæ?»
– Изæд дæр нæ дæн, идауæг дæр нæ дæн,
Зæнхон лæг дæн, Дигор-Хъабани фурт Айдарухъ дæн.
Хуардтонцæ, ниуазтонцæ.
Кæсæги æлдæртти æфсинттæ, кизгуттæ ба имæ
Дуæрттæ-къæрæзгитæй кастæнцæ:
Ци дессаг æй, ци хуæрзконд æй.
Æ гурæбæл ин нивтæ кодтонцæ,
Æ къахдзæфтæбæл ин нивтæ карстонцæ,
Уотæ имæ хицæ кодтонцæ,
'Ма ка имæ æ дзедзетæ æвдиста,
Ка ба имæ æ дзигкотæ æздухта,
Ка ба имæ æ къох тилдта, мæнмæ рацо, зæгъгæ.
Цæун фæндæ искодта,
'Ма ин æ хæтдзæ устур саугъатæ равардтонцæ:
Ка ин æхсгæ топп лæвардта,
Ка ин сугъзæринæй гъæст æхсаргард лæвардта,
Ка ин саулох бæх æд саргъ, æд идонæ лæвардта,
Ка ин сугъзæрингун сахат лæвардта,
Ка ба ин æ къохбæл сугъзæринæ къохдарæн бакæнидæ,
Кæстæреуæг кæнæг ба ин æ хæтдзæ адтæй Бадели:
Едонæбæл хуæцæг 'ма æ æгъдинцойнæбæл хуæцæг,
Йе 'хуæрст куд адтæй, уотæ.
Ку 'рбацудайдæ,
Мæхчески æмбурд ку кæнионцæ, уæдта 'й æмбурди
Кæрони бæхбæттæнæн дардта Бадели.
Гъенур ба Айдарухъ базæронд æй
'Ма æмбурдмæ нæбал цæуй,
Кæсæнцæстæй ракæсуй 'ма Бадели ниууидта:
Æмбурди дуййех кæнгæ исцудæй æнæ 'рфестæгуогæй.
Еци бон Айдарухъ загъта:
– Æ, уæууæй, уæууæй, Дигорæ, Айдарухъ уин базæронд æй.
Æз æй бæхбæттæнæн ку дардтон,
Нур ба уин фестæг дæр ку нæбал кæнуй,
Æцæг уæмæ ку некебал ес, Дигорæ».
Уæдæй фæстæмæ Айдарухъ
Æмбурдмæ æ фур мæстæй нæбал цудæй.

Радзырдта йæ Кæлухты Елмæрза. 10 август, 1927 аз, Уæхъæц. Ныффыста йæ Толасты Андрей.
ЦИГСИИ-йы архив, фольклор № 15, папкæ 82, ф. 197–198.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад