Главная > Историон æмæ тохы зарджытæ > Мустафай зар

Мустафай зар

25 декабря 2010. Разместил: 00mN1ck

– Гъæйтт, мæ хъæболæ Мустафа,
Лæги сæр дæ багъудæй! –
Ку бадзоруй имæ уотæ æ мадæ.
Мустафа ку адтæй еунæг лæхъуæн
Æма йе гъонгæс ку адтæй сæдæ иуонугебæл,
Уой хæтдзæ ибæл сæумон хори рохс
Ку æрбаивадæй. И 'нгæрттæй, зæгъуй,
Уæд йеу ку фæффæдес кодта:
– Уæ фонси дзогтæ уин ку фæттæрунцæ,
Уæртæ и Сарий бохъургинтæ!
Уæд и мадæ ку райгъал кæнуй
Æ йеунæг лæхъуæни,
Уæд дзианум Мустафа æхе
Ку барæвдзæ кæнуй,
Æма сæ сорунтæ ку ниййагайуй;
Бæргæ исæййафуй Сарий æфсади,
Куд исхæрд кодтонцæ, уотемæй.
Бæргæ сæбæл æрзелуй Мустафа цæргæсау,
И 'фцæгмæ куд исхъæрттæнцæ, уотемæй,
Сæ размæ ку 'рбадтæй риндзи
И сау хонхи æскъуди,
Æ хъæрæймагæй сæбæл уордæгæй
Топпадзагъд кæнун ку исамайуй.
Сæ хауæггаг син ледзæггаг ку фæккодта,
И гъæуи рæгъау фæстæмæ ку раздахта.
Уæд æй и гиаур Сарий бохъургинтæ
Ку фæццæф кодтонцæ, æ риндзи бадгæй.
Ку ниххауй дагъи, æ тоги æвдулгæй,
Æ сау рæсугъд, æ бийнонтæ æ зæрди ку 'рæфтуйунцæ.
Сарий байзайæггæгтæ фæдеси
Бæргæ нихъхъæртунцæ Сарий гъæумæ,
И уорс рехæгунтæн ку радзорунцæ.
И зæронд лæгтæ ку ниддес унцæ,
Ци дессаг адтæй, ци алæмæт æй,
Ауæхæн цау нæбæл ку нæма æрцудæй,
И зæрæндтæ имæ ку ранæхстæр унцæ
Æма имæ бæргæ исхъæртунцæ.
Ку 'й исесунцæ хонхи дагъæй,
Уодхæрттæгæнгæй, Мустафай,
И кæстæртæ ибæл ку рафæндæ кæнунцæ:
– Фидгуни къуæхтау æй æрацæй кæнæн.
Уæд и хестæртæ ку радзорунцæ:
– Цæй, нийуадзетæ, банинбæздзæнæй йеу есгæми.
Ку 'й æрæвæрунцæ мæрсинтæбæл
Æма ранæхстæр унцæ Саримæ.
Уæд и Мустафа ку исдзæбæх уй,
Уæд æй ку бакодтонцæ бæрзонд мæсуги.
Мади зæрдæ кæми гæдзæ кодта:
Æ лæхъуæни тог йесунмæ
Æфсæдти хæтдзæ ку ранæхстæруй.
Сарий æфцæгмæ уæд ку исхъæртунцæ,
Хæрæ мегъæ сæбæл уоми ку 'рбадуй.
Уоми сæмæ Сарий фиййау ку ниццæуй
Æма сæ ку бафæрсуй: – Циуавæр айтæ? –
Уæд уомæн æ мадæ ку ниццæйдзоруй
Æ зæрди хабæрттæ.
– Æ мадта уин уой ка рахона, йе ба – æз, –
Уотæ син фиййау зæрдæ ку байвæруй.
Ку ниццæуй Сарий гъæумæ
Æма йимæ ку бадзоруй;
Уордæгæй Мустафа ку рагæпп кæнуй,
Уотемæй ледзунмæ ку ниййагайуй,
Комкоммæ къулух, фæсаууон дзæбæхæй.
Уæд Сари æд зæронд, æд нæуæг
Æ фæсте ниппарасетæ унцæ.
Уотемæйти сæ æнæтугъдон рæвдзæй
Æфсæдти астæу ку исмедæг кодта.
Уотемæй уоми Сарий адæми
Æнæхатирæй ку ниццагъта.
Уотемæй Мустафа æ мади хæтдзæ,
Йе 'фсæдти хæтдзæ ку ниффардæг уй.

Радзырдта йæ Хæмыцаты А. Ныффыста йæ Хъазыбегты Хъазыбег.
«Ирон адæмон сфæлдыстад», Дзæуджыхъæу, 1949, ф. 257–259.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад