поиск в интернете
расширенный поиск
Иу лæг – æфсад у, дыууæ – уæлахиз. Сделать стартовойНаписать письмо Добавить в избранное
 
Регистрация   Забыли пароль?
  Главная Библиотека Регистрация Добавить новость Новое на сайте Статистика Форум Контакты О сайте
 
  Навигация
Авторские статьи
Общество
Литература
Осетинские сказки
Музыка
Фото
Видео
  Книги
История Осетии
История Алан
Аристократия Алан
История Южной Осетии
Исторический атлас
Осетинский аул
Традиции и обычаи
Три Слезы Бога
Религиозное мировоззрение
Фамилии и имена
Песни далеких лет
Нарты-Арии
Ир-Ас-Аланское Единобожие
Ингушско-Осетинские
Ирон æгъдæуттæ
  Интересные материалы
Древность
Скифы
Сарматы
Аланы
Новая История
Современность
Личности
Гербы и Флаги
  Духовный мир
Святые места
Древние учения
Нартский эпос
Культура
Религия
Теософия и теология
  Строим РЮО 
Политика
Религия
Ир-асский язык
Образование
Искусство
Экономика
  Реклама
 
 
Нарти гуппургинти синд Уазабæл
Автор: 00mN1ck / 13 июля 2010 / Категория: Ирон адæмон сфæлдыстад » Нарты кадджытæ
    Дуйнебæл рæсугъд исæнтæстæй Акула-рæсугъд. Терк æма Бæлхъ кæми йеу кæнунцæ, уоми ин æрхин мæсуг адтæй. Алли бон дæр арвбæл æртæ зелæни кодта – тахтæй. Фæууинæн ин н' адтæй. Нарти гуппургинтæ æ фæууиндмæ бæлдтæнцæ. Къанци фурт Сæууай, Хæмици фурт Батраз, сосдорæй ист сосæг æлдари фурт Сослан. Сенгæ уотæ кодтонцæ, æма хуæнхтæ калдæнцæ, Сау гъæди бæлæстæ хъантæ кодтонцæ. Зæнхæ лиу-лиу кодта. Уалæнги зæронд Орæзмæг цауæни адтæй 'ма сæбæл æрбацудæй.
    – Чи кæнтæ, Нарти гуппургинтæ Æхсæртæгкатæ, уæ гупп-гуппæй адæми тог ку раледзун кодтайтæ.
    – Нæ хестæр æнсувæр Орæзмæг, чи кæнæн, уой дин зæгъдзинан. Акула-рæсугъд алли бон дæр арвбæл æртæ зелæни кæнуй. Кæд æй йести амалæй фæууинианæ.
    – Йæ, Нартæ, – загъта, – æз уин æй ку æрбахонон, уæд мин чи лæвæрттæ ракæндзинайтæ?
    Хæмици фурт Батраз ин загъта:
    – Æз дин, евгъаугæ ка нæ кæнуй, йеци топп ратдзæнæн.
    Сослан загъта:
    – Хонх дууйех ка хаун кæнуй, йеци кард дин ратдзæнæн.
    Къанци фурт Сæууай загъта:
     – Хонх цæрд цъасæ ка кæнуй, уоци мудзура дин ратдзæнæн.
    – Ма бауæгæ уотæ, бамæхезетæ, æз уин æй ардæмæ æрбахъæртун кæндзæнæн.
    Цæун байдæдта, 'ма мæсугмæ ку нихъхъæрттæй Балхъæй Терки астæумæ, уæд æ бæхæн загъта: «Мæсугмæ ку нихъхъæртæн, уæд дæ къах бакъуæрæ 'ма рахъан уо. Æз ба дæ нæндзæнæн, фал ма фестæ, цалдæн нæмæ Акула рарвета, уалдæн».
    Мæсугмæ ку нихъхъæрттæй, уæд бæх рахъан æй. Гъема 'й нæмун байдæдта. Æ бæх нæбал истадæй.
    Акула æ койгæнæг кизгæн загъта:
    – Ракæсæ, нийймæцо 'ма базонæ, – кенæ расуг æй, кенæ ба гъæла æй, кенæ ба ибæл устур зин гъуддаг йес, 'ма имæ сагъæс йес.
    Раимæцудæй кизгæ, 'ма 'й бафарста:
    – Цæбæл марис дæ бæх, зæронд лæг?
    – Куд æй ма марон, мæ хуæрæ æ седзæрти хæтдзæ байзадæй. Нур ба Ауолгъан æма Беуолгъани æфсæдтæ уоми тохунцæ. Изæрмæ кунæ рахъæртон, уæд йетæ фесавдæнцæ, 'ма мæмæ уони сагъæс йес.
    Иссудæй кизгæ 'ма загъта Акулайæн, ауæхæн сагъæстæ имæ ес, зæгъгæ.
    – Цо, уотæ ин зæгъæ: ахсæви ами лæууæ, дæ бæх дæр бауолæфдзæнæй.
    'Ма ин загъта Орæзмæг:
    – Ай уалæнгæ дæр мæ сумах хузæн уосæнгтæ уорамæг адтæй.
    Нигки дæр ин кизгæ загъта:
    – Лæууæ, уæддæр дæ бæх нæ бафæраздзæнæй, 'ма нæ фæццæудзæнæ.
    – Мадта хуарз, – зæгъгæ, 'ма æхсæвæ байзадæй уоми.
    И сæумæ раги фестадæй 'ма кæсæнцæстæй ракастæй.
    – Дуйней басугътонцæ дууæ æфсæдти, мæ цуд дæр ма дзæгъæли 'й. Ардиги фæстæмæ 'здæхун гъæуй. Алке æ сæрæн, ци мадзал йе, уой кæнæд.
    Акула загъта:
    – Ами нæ дзæгъæл будури ма уадзæ, дæ хæтдзæ нæ хонæ.
    Орæзмæги ма хуæздæр хуарз ци гъудæй?!
    – Мæхе сæр багъæуай кæнун ку бафæразинæ, сумах бæгъдауони ма æз цæмæ цæун?
     Акула ниллæудтæй:
    – Хонæ нæ!
    Цуппæрдзæлхуг исефтигътонцæ 'ма æртемæй рабадтæнцæ. Цæун байдæдтонцæ. Уазамæ хæстæг кæнун ку байдæдтонцæ, уæд Нартæн сæ туххуаст синдæй, сæ гупп-гуппæй зæнхæ 'змæлгæ кодта. Акула Орæзмæги бафарста:
    – Чи дессаг æй: дуйне ихæлгæ ку кæнуй?
    – Нæхуæдтæ ан, – зæгъгæ, загъта, – нæхе Нарти гуппургинти синд æй. Ами ба тæссаг неци ес.
    Ку сæмæ исхъæрттæй, уæд ибæл бацийнæ кодтонцæ. Акула æ уæрдунæй ку 'рхизтæй, уæд Сослан æ уонтæ базмæлун кодта.
    – Ацал-ауал бони, Акула, мах дæу ку агорæн. Мæ хæтдзæ ку ракафисæ.
    – Лæгигъæдгун Сослан, дæу хæтдзæ мин кафæн нæййе. Рæуæг лæг, æнæууæнкæ лæг. Фæдеси лæг. Йеунæг сæумæ фæдеси ку ралæуерай, дæ дзабурти фæдхуасæ ку не 'ссерай, йеуæд мæ уобæл рамардзæнæ, 'ма цардуодæй цирт неке гъæуй.
    Сосланæн æ уонтæ фæббæрзонд æнцæ, æ сæр ба æрхаудтæй. Ке нецибæл ин си адтæй, уой базудта.
    Къанци фурт Сæууай загъта:
    – Мæн хæтдзæ ракафæ, Акула.
    – Хуарз лæг дæ, Къанци фурт Сæууай, лæгигъæдгун, – зæгъгæ, загъта Акула. – Фал мæнгæй къох лæг дæ, йеу уæхæни дæбæл есге фембæлдзæнæй 'ма дин дæ къох фæллихъæ кæндзæнæй. Æнæкъох лæги хæтдзæ фæццæрунмæ неци бакæндзæнæн.
    Æ сæр фæггубур æй, æ уонтæ фæббæрзонд æнцæ Сæууайæн, ке нецибал ин си адтæй, уой базудта.
    Орæзмæг загъта:
    – Мæн хæтдзæ ракафæ, Акула. Цæугæ дæр дæмæ æз фæккодтон, хонгæ дæр дæ æз æрбакодтон.
    – Орæзмæг, лæгигъæдгун, амалгун лæг. Фал дæмæ кæсун, уалдзигон цъæх кæрдæг 'ма фæззигон фæсалæ ку схæлæ-мулæ унцæ, уой хузон дæ закъæ. Дæу хæтдзæ дæр неци ракафдзæнæн.
    Хæмици фурт Батраз загъта:
    – Мæн хæтдзæ ракафæ, Акула.
    – Дæу хæтдзæ ба ракафдзæнæн, еу гъуддаг дин зæгъдзæнæн 'ма кæд уой бакæнун бафæразай, уæд. Дæ фидæ Хæмиц, уой фидæ ба Болат. Авдсæрон базургин уæйуг æй фæххаста, дууæ хонхи фуритау кæми тохунцæ, уой фæстемæ. Уоми бæхгæс хæтуй байрагдзар къæреди, йе ба ибæл ниллискъ æй, хорбони ибæл исæнцъулуй, уарун бони ба ибæл æривæзуй. 'Ма кæд уой рахæссун бафæразай, уæд дæу хæтдзæ ба ракафдзæнæн.
    Батраз загъта Нарти гуппургинтæн:
    – Æз цæун Болати хæссунмæ. Мæ рацуди уæнгæ уæ синд куд нæ фехæла, уотæ. Акулай дæр мин куд нæ бафхуæрайтæ, уотæ.
    Æрбацудæй 'ма æ мадæн загъта:
    – Нана, Нарти уонæхсартæ фонс кæнунмæ ку цæунцæ. Йестæмæй мæ ку барæвдзæ кодтайсæ.
    – Дæ нана дæ хортæй бафсæда. Ду мин Нарти уонæхсарти хæтдзæ цæунгъон рауай, уæдта рæвдзи туххæй ба нæ байзайдзæнæ. Уæртæ сау кирæ дзаумауæй идзаг æй. Фидæй-фуртмæ тонауæй ке фæйистайтæ, йетæ уоми 'нцæ. Хатиагау имæ исдзорæ, 'ма байгом уодзæнæй. Æфсæйнаг хъæстаргъ дæ рази, 'ма сæ уобæл æвзарæ. 'Ма дин уой дууæ 'мбеси ка рахаун кæна, йе дин кард. Дæ фиди фидæ Болати саргъ æмæ идонæ рагъæнбæл ауигъд. Уони райсæ 'ма цо саугъæди кæронмæ Мæрæмæ. Мæри кæронмæ ба сибулдзæ бæласæ. Бæласæмæ исхезæ 'ма идонæ бателæ. 'Ма дæмæ къода уорс-аласа уæлвидæнттæ рауагъта 'ма дæмæ æрцæудзæнæй, идони æ сæр рацæвдзæнæй. Саргъ ибæл февæрæ, 'ма ибæл кæд бадун бафæразай, уæд дин йе ба бæх.
    Райста саргъ æма идонæ. Цæун байдæдта 'ма иссудæй еци бæласæмæ, саугъæди кæронмæ Мæри. Исхизтæй 'ма идонæ батилдта, тæхгæ æрцудæй 'ма идони æ сæр рацавта уорс бæх. Æваст ибæл саргъ февардта 'ма ибæл фæббадтæй.
    Бæх лæппой æртæ хатти уæларв фæккодта, æртæ хатти ба дæлзæнхæ. Нæ фезмалдæй Хæмици фурт Батраз. 'Ма имæ бæх сдзурдта уæдта:
    – Къæсибадæг битдзеу, бадæгæн мин исбæздзæнæ, æнгъæлдæн, – зæгъгæ. Йедонæбæл цубур фæххуæстæй 'ма 'й ниццæфтæ кодта. Кæсгон хумæн æй æ дæргъи дууердæмæ, хумæгæнгæ, рацæун кодта 'ма ин загъта:
    – Хæрæги къæлæу, мадзал агъонмæ мин ду бæхæн исбæздзæнæ.
    Райбæлбадтæй 'ма сæхемæ æрбацудæй. Айкæ 'ма 'й сапойнæй хъæбæр хуарз ниртадта. Æ мадæн загъта:
    – Рагъæн рæуæг æма хъæстæн дзæбæх хуаллаг мин искæнæ.
    Æ хуаллаг райста 'ма цæун байдæдта. Ци фæццудæй, уæдта 'й æ бæх бафарста:
    – Æрра битдзеу, бадгæ ракодтай 'ма цæугæ кæнæн, фал ци кæнуйнаг дæ, уой мин зæгъгæ цæмæннæ кæни? Дæ фиди фидæ Болат мæнбæл йесгумæ ку цæуидæ, уæд æнæ баунаффæ кæнгæ ку нæ цудан.
    Батраз æрхизтæй 'ма имæ дзоруй:
    – Зæгъун дин æй, Болати хæссунмæ цæун.
    – Болат дæуæн зин рахæссæн æй, – зæгъгæ ин загъта бæх, – уой туххæй 'ма Болат, дууæ хонхи фурау кæми тохунцæ, уой фæсте æй. Дæ фидæ Хæмиц цудæй мæнбæл Болати хæссунмæ. 'Ма мæ цæвун нæ бафæразта, æз ба лæуерун нæ бафæразтон. Дууæ хонхи мин мæ думæг æрæййафтонцæ, 'ма къода уоми фæддæн. Кæд мæ цæвун бафæразай, уæд дин дзурд дæттун, ба 'й кæндзинан. Кæд мæ цæвун нæ бафæразай, уæдта дæхе дæр фесафтай, мæн дæр фесафтай. Дууæ хонхи фурау кæми тохунцæ, уордæмæ ку схъæртæн, уæд мæ дууердæмæ хуарз рагъазун кæнæ. Уæдта мæ йецирдæмæ фæййаразæ 'ма мæ уæхæн цæфтæ никкæнæ, дæ къохæй уæфсæгтæ куд рахауа, мæ фарсæй ба æркъиагутæ, уотæ.
    Ку схъæрттæй дууæ хонхемæ, уæд æй Хæмици фурт Батраз дууердæмæ рагъазун кодта. Уæдта 'й уæхæн цæфтæ никкодта, 'ма æ къохæй уæфсæгтæ рахаудтæй, бæхи фарсæй ба – æркъиæгтæ. Гъема, дууæ хонхи фурау кæми тухтæнцæ, уоми балæуирдта. Уоми ба дуйне уæхæн дуйне адтæй, 'ма гулуæзгутæ, фонсæй идзаг, фиййæуттæ, бæхгæстæ, гъонгæстæ.
    Бæхтæбæл разилдæй. Сæ кæронмæ зæронд лæг лæудтæй.
    – Дæ бон хуарз, – зæгъгæ имæ исдзурдта зæронд лæгмæ.
    – Ке бон æй, уой хуарз дæ уæд. Абони уалдæнгæ ардæмæ æрбацæуæг ку нæма фæййидтон, цæуæг имæ ку нæ уадзуй, тæхæг имæ ку нæ уадзуй, уæд ду ци дессаг дæ, ардæмæ цæмæ æрбацудтæ?
    Зæронд лæг бæхбæл æрзилдæй. Æ цæсти сугтæ гæр-гæрæй æркалдæнцæ. Батраз имæ дзоруй:
    – Ци кæни, зæронд лæг, мæ фæууиндæ дин уотæ гъулæг адтæй?
    – Дæ фæууиндæ мин гъулæг н' адтæй, фал аци гиаури къохи ку бафтудтæн, уæд ми ай хузи бæх байзадæй. Гъема 'й, æвæдзи, берæгътæ йесгæми бахуардтонцæ. Гъема мæ зæрди йе æрбафтудæй, мæ цæсти сугтæ уобæл æркалдтон.
    – Æдта кæугæ ма кæнæ, дæхецæй ка байзадæй, а йеци бæх æй. Æз ба дæ фурти фурт, Хæмици фурт Батраз дæн.
    – Мадта, рахезæ 'ма дин де уæнгтæ фæууинон, – Болат ин загъта.
    Æрхизтæй Батраз, 'ма ин Болат йе уæнгтæ фæууидта.
    – Нæхецæй дæ, нæхе бæрæггæнæнтæ дæбæл йес. Фал цæмæ æрбацудтæ, æз ке фесафтæн, йе берæ ку æй, ду ба ма дæхе цæмæ фесафтай?
    – Гузавæ ма кæнæ, Хуцау ке зæгъа, йе уодзæнæй.И гиаурæн æ бунат кæми 'й, уой мин зæгъæ.
    – Уæлæ сау хонхи сау лæгæти. Æ дуарбæл дор æвæрд, рахатæн кæмæн нæййес, уæхæн къæйæ. Æстæмæй-астмæ хусгæ кæнуй.
    Иссудæй Батраз сау хонхмæ. Дуарбæл ци хонх æвæрд адтæй, уой фæрсæрдæмæ ранхуæрста 'ма бацудæй медæгмæ. Æ нивæрзæн уæйугæн бадтæй Хори кизгæ Хорческæ, æ къæхтæмæ бадтæй Мæйи кизгæ Мисирхан.
    – Уæ бон хуарз, – зæгъгæ сæмæ исдзурдта Батраз.
    Дууæ дæр æмцъухæй исдзурдтонцæ:
    – Ке бон æй, уой хуарз дæ уæд, Хæмици фурт Батраз.
    Æ гъæлæсæй æхседæн зингитæ калдæй уæйугæн, тугурбæл сæхе цавтонцæ, фæстæмæ ба æвзалутæй калдæнцæ тугурæй. Дууæ кизгемæн сæ цæсти суг донау уадæй. Зæнхи астæумæ æмбурд кодта цæсти суг, уоми ба налхъут-налмас фестидæ.
    Басæфарста дууæ кизгей, æ адзал цæмæй æй, зæгъгæ.
    –Уой адзалæн ду неци амал искæндзæнæ, – зæгъгæ, загътонцæ дууæ кизги. – Æ адзал уомæй æй: сау кири – челхъ. Æ йеу фарсæй иннердæмæ рахатунмæ 'й гъæуй сæдæ къамбеци.
    Хæмици фурт Батраз бацудæй 'ма хатиагау исдзурдта и кирæмæ. Кири сæр фегон æй. Батраз нивналдта 'ма сæдæ къамбеци хатунмæ ке гъудæй, уой исиста, 'ма 'й саудор ракодта, рарæуигъта æй, 'ма йеци йеу рæуигъди уæйуги æхсæз сæри рахаун кодта, æвдæймаг сæр фæгъгъæр кодта:
    – Хæмици фурт Батраз хусгæ лæг рамарунмæ дæ сæр æрхæссуйнаг ку н'адтæ!
    – Бæргæ н'адтæн, фал нæ æгæр бафхуардтай, 'ма мæ тог нæбал ниллæудтæй.
    – Цæвæ-ма мæ йеума хатт дæр, – зæгъгæ, загъта уæйуг.
    – На, цæвгæ ба дæ нæбал никкæндзæнæн. Æхсæртæгкатæ Елиайау йеудзæфон æнцæ, – зæгъуй Батраз.
    И уæйуг ниммардæй. Дууæ кизги загътонцæ:
    – Хæмици фурт Батраз йеу дуйнебæл нæ бафтауæ.
    – Дуйней царди дзæбæхтæй имæ ци адтæй, уони мин йеугурæй дæр радзоретæ.
    – Фиццаг ин зонæн – уæртæ хонхи дагъи æхсири цадæ. Æрбасихæссæ, 'ма си и зæронд лæги ниртайæ. Нæуæг мелтæ ка уадза, уæхæн лæхъуæн фестдзæнæй. Уæдта уæртæ медæггаг хатæни æркъиаг, уæдта буйнагин цъæфсæ, уæдта хъæнзал дууæ базури. Æркъиагбæл цидæр мулк ниццурхай – байбæлцæудзæнæй. Æ дуйне фонс йеугурæй дæр æ бон æй йеу хаст ракæнун. Буйнагин цъæфсæ ибæл æрбатохæ 'ма си хаугæ дæр неци ракæндзæнæй, гæлæбой уæзæ дæр си нæбал уодзæнæй. Дууæ базуребæл сæ ниввæрæ, уæдта сæ хæсдзæнæнцæ 'ма сæ арвæй зæнхи астæу фæххæсдзæнæнцæ, кумæ дæ гъæуа, уордæмæ.
    Æхсири цадæй æ цулухъи идзаг æрбахаста. Болати ниртадта. Болат нæуæг уосгор лæхъуæн фестадæй. Фонсæй цидæр адтæй – фусæй, фиртонæй, бæхæй, уони æркъиагбæл бакодтонцæ. Цъæфсæй сæ ниббаста. Нигкидæр фæццудæй 'ма бабæй цулухъи дзаг æхсир æрбахаста. Кадæр адтæнцæ – бæх уæд, лæг уæд, кизгæ уæд – йеугурæй дæр æркъиагбæл рабадтæнцæ. Дууæ базуребæл æй æривардтонцæ. Дууæ хонхи фурау кæми тухтæнцæ, уой сæрти æрбатахтæнцæ. Нартæ дæр ма се 'рцудмæ гуппæй синдтонцæ. Акула Батразæн йе 'рцудмæ æ къахæй æ сæрмæ æ фæлуст рацæттæ кодта. Цулухъи дзаг ци æхсир æрхаста, уомæй Батраз Хæмици ниртадта, 'ма йе дæр лæхъуæн фестадæй. Дуйней фонсæй байдзаг æй. Æркъиаг æма цъæфси, уæдта дууæ базури Батраз бафснайдта. Фæххабар кодтонцæ Нартæмæ. Къахбæл цæунгъон ка 'дтæй, йе киндзхон рацудæй. Дессагдæр гъуддаг Нарти астæу не 'рцудæй. Болат Мæйи кизги Мисирхани æрхудта. Хæмиц ба Хори кизги Хорчески æрхудта. Хæмици фурт Батраз ба Акулай æрхудта.
    Фидæ, фурт æма фурти фурт – Болат, Хæмиц æма Батраз – æртемæй йеу æхсæвæбæл æртæ ности æрхудтонцæ.

Радзырдта йæ Дзадзаты Орæзмæг, 85-аздзыд, 5 февраль, 1941 аз, Цыкола. Ныффыста йæ Хæмыцаты А.
ЦИГСИИ-йы архив, экспед.бр.VI, фольклор № 56, папкæ 23, ф.105–117.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна
Информация
Посетители, находящиеся в группе Гости, не могут оставлять комментарии к данной публикации.
  Информация

Идея герба производна из идеологии Нартиады: высшая сфера УÆЛÆ представляет мировой разум МОН самой чашей уацамонгæ. Сама чаша и есть воплощение идеи перехода от разума МОН к его информационному выражению – к вести УАЦ. Далее...

  Опрос
Отдельный сайт
В разделе на этом сайте
В разделе на этом сайте с другим дизайном
На поддомене с другим дизайном


  Популярное
  Архив
Февраль 2022 (1)
Ноябрь 2021 (2)
Сентябрь 2021 (1)
Июль 2021 (1)
Май 2021 (2)
Апрель 2021 (1)
  Друзья

Патриоты Осетии

Осетия и Осетины

ИА ОСинформ

Ирон Фæндаг

Ирон Адæм

Ацæтæ

Список партнеров

  Реклама
 
 
  © 2006—2022 iratta.com — история и культура Осетии
все права защищены
Рейтинг@Mail.ru