Главная > Нарты кадджытæ > Нарти кæстæр Уазими фурт минкъий Ацæмæзи зар

Нарти кæстæр Уазими фурт минкъий Ацæмæзи зар


26 августа 2010. Разместил: 00mN1ck
Нарти хестæртæ йин разæгъунцæ:
«Цауæни нин цæмæннæ фæццæуис?»
Æ сау хъæрæймаг æма æ сугъзæринæ
Саутæфтуд хæтæл райсуй ма ранæхстæруй.
Уорс хонхи сæрмæ уæд исхезуй.
Уордиги йе ку ниццæгъдуй,
Уæд ибæл Хъуми будури
Дудахътæ ма сувæхътæ
Семун байдайунцæ.
Нигкидæр æй ку ниццæгъдуй,
Уæд ибæл Уорс хонх уорс æзменсæ
Уæд фестуй.
Уордиги ранæхстæруй;
Сау хонхи сæрмæ уæд исхезуй.
Уордиги дæр æй ку ниццæгъдуй,
Стур сау гъæдæ йибæл уæд ку низмæлуй;
Саугъæдтон æрситæ ибæл
Лæулæугæнгæ семгæ ку рацæунцæ.
Никкидæр æй ку ниццæгъдуй:
Стур æрдозтæй гъелсæртæ ма хъелсæртæ
Дзогтæ-дзогтæ уæд ку рацæунцæ.
Никкидæр æй ку ниццæгъдуй:
Сау гъæдæ йибæл пъастугæйттæ
Уæд ку рахæссуй.
Нигкидæр æй ку ниццæгъдуй:
Стур дæнттæ йибæл зуртæ-зуртæ
Уæд фестунцæ.
Нигкидæр æй ку ниццæгъдуй:
Æности цъететæ йибæл
Тайун ку байдайунцæ.
Нигкидæр æй ку ниццæгъдуй:
Сау хонхи айнæг йибæл
Уæд ку байгон уй.
Уордиги йимæ сау дзæбодуртæ
'Ма сау нæл сæгътæ ку рацæунцæ
Семгæ-семгæ.
Нигкидæр æй ку ниццæгъдуй:
Уæд Сайнæг æлдари кизгæ
Агундæ-рæсугъд уæд ку рацæуй –
Æ сугъзæрийнæ саутæфтуд гъæдин къæхти
'Ма йимæ радзоруй:
– Йæ, Нарти кæстæр, Уази фурт Ацæмæз!
Дæ сугъзæринæ саутæфтуд хæтæл
Æма дæ сау дзæбодуртæ
Æма дæ сау нæл сæгътæ,
Дæхуæдæг Нартæн хайир ку уайсæ,
'Ма йетæ ба мæн ку уайонцæ!
Ацæмæз рамæстгунæй
Сау хонхбæл æ сугъзæрийнæ
Саутæфтуд хæтæл уæд ку ниццæвуй.
Листæг æгъзæлæнтæ Сау хонхи бунмæ
Уæд ку æригъзæлунцæ.
Уазими фурт мингий Ацæмæз
Сæргубур æма уонтæбæрзондæй
Нартмæ уæд ку раздæхуй.
Агундæ-рæсугъд Сау хонхи бунмæ
Уæд ку æрхезуй тасæ-уасæгæнгæ;
Æ дари хæдони дусмæ сæ
Уæд ку æрæмбурд кæнуй.
Сау хонхи сæрмæ уæд исæздæхуй,
Æ фиди сау кирæ уæд байгон кæнуй,
Уордиги сау буйнагин æхсæ уæд исесуй,
Сугъзæрийнæ саутæфтуд хæтæл уæд ниццæвуй,
Æстæмæй-астмæ аст хайи хуæздæр
Уæд ку фестуй.
Уазими фурт минги Ацæмæз
И Нартмæ ниццæуй.
– Уæ, мæ хестæртæ, саги сæр уе 'хсæвæр! –
Сæмæ дзоруй.
– Уæ, алли бон æгас цо, нæ кæстæр!
Ке кой кæнай, нæ уæлкъæсæр:
Дæ кой дин кодтан,
Уосæ ракорæ, афонæ дин æй!
– Кæми уæ фæнди, уоми арази дæн, –
Загъта:
– Кæд мин коретæ, уæдта мин ракоретæ
Сайнæг æлдари кизгæ Агундæ-рæсугъди! –
Сæ фæндæ ралухæй.
Раинæйкурдтонцæ.
Хонунмæ ин ранæхстæрæнцæ.
Нарти Сатана къеретæ искæнуй.
Нарти хестæртæ исковунцæ.
Рæсти Уасгерги рæстфæндагхæссæг,
Разæй цæуæг.
И уорс Йелийа ба æ аллифарс
Уорс æрттевæнтæгæнгæ ку цæуй.
Сæумон изæдтæ 'ма изæйрон идаугутæ
Ба йин киндзхонтæ,
Мадæ-Майрæн ба йин æ киндзæмбал.
Алай-булайгæнгæ уæд ранæхстæрунцæ.
И Нартмæ 'й æрхонунцæ.
Устур кувдтитæ йибæл уæд искæнунцæ.
Фарни зартæ уæд фæккæнунцæ.
Аци игъæлдзæгдзинади еци бони
Фарни игъæлдзæгдзинади Хуцау фæккæнæд!

Радзырдта йæ Тугъанты Тæтæрхъан, 22 январь, 1921 аз. Дзæуджы¬хъæу. Ныффыста йæ Дзагурти Губади.
ЦИГСИИ-йы архив, фонд Дзагурова Г.А., опись 1, папкæ 13, ф.135–137.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад
Рейтинг@Mail.ru