Главная > Нарты кадджытæ > Адæкеи кизгæ Уæзæвтауæ

Адæкеи кизгæ Уæзæвтауæ


26 августа 2010. Разместил: 00mN1ck
    Æхсæртæгкатæ баунаффæ кодтонцæ, Адæкези кизгæ уæддæр Æхсæртæгкатæй цæмæй нæ рацох уа, уобæл: Орæзмæгæн æй ракорæн, зæгъгæ. Орæзмæги исрæвдзæ кæнунцæ, уосгор рæвдзæ. Дууадæс æмбали ин рарветунцæ Нарти дзæбæхтæй æ хæтдзæ. Æрцудæнцæ Адæкези кизгæ Уæзæвтауæмæ корунмæ. Сæхе хузæн йеу гъæздуг лæгмæ бафусун кодтонцæ. Сæ фусуни сæ хæтдзæ райстонцæ, уотемæй барвистонцæ минæвæрттæ. Минæвæрттæ дзубанди кæнунцæ:
    – Уадзæн Æхсæртæгкатæ загъдæуй, уонæн сæ хестæр Орæзмæг уæ æхецæн хæстæгæн агоруй, – зæгъгæ.
    Адæкез загъта:
    – Ци зæгъун гъæуй Æхсæртæгкатæй, арв си ниннæрун ку не 'ндеуй. Мæн нæ, фал хуæздæри аггаг дæр æнцæ. Фал кизгæн æ унаффæ æхемæ 'й. Зæгъæ, кизгæ, мæ хор, дæ загъд.
    – Бахатир кæнтæ, – дзоруй Уæзæвтауæ, – мæ мадæ, мæ гъуддаг ка 'й, уой мæхемæ дæттуй. 'Ма уин зæгъдзæнæн мæ загъд. Орæзмæгмæ цæмæннæ æнгъезуй æрцæун, хъæбæр хуарз æй. Фал куй дæр ку базæронд уй, уæд куйвæдес нæбал феййафуй. Орæзмæг дæр уой хузæн. Йе 'фсæртæ нæбал æнгом кæнунцæ, æ сæтæ нæбал уорамуй. 'Ма уой сæтæ къохмæрзæнæй фæссæрфунмæ неци бакæндзæнæн.
    Хъæбæр мæтъæлæй рандæнцæ фæстæмæ Æхсæртæгкати минæвæрттæ. Æрдзурдтонцæ сæ хабар Æхсæртæгкатæн. Мадта, Хæмиц кæстæр æй, ма уой рарветæн, зæгъгæ. Хæмици исрæвдзæ кодтонцæ Орæзмæгæй хуæздæр. Æ хæтдзæ ин рарвистонцæ дууадæс æмбали. Йетæ дæр бабæй йеу уæхæн фусунмæ бацудæнцæ. Райстонцæ сæ фусуни кегъæреæн. Бацудæнцæ Адæкези хæдзарæмæ. Æрбадтæнцæ. Дзорун райдæдтонцæ, Æхсæртæгкати æстаунцæ. Адæкез син загъта:
    – Зонун сæ мæхуæдæг дæр. Æхсæртæгкатæ æнцæ Нарти сæр. Мæн ба куд нæ фæндуй уони хæтдзæ бахæстæг ун, фал кизгæн æ унаффæ æхемæ 'й.
    И кизгæ сæ сæргъи лæууй 'ма сæмæ дзоруй:
    – Сумах мæнмæ дзуапп æнгъæл кæсетæ, 'ма уин зæгъдзæнæн нуртæкки. Æхсæртæгкатæй лæгъуз нæ зæгъун. Арв уи нæрун ку не 'ндеуй. Фал Хæмицæн æ сугъзæрийнæ дæндæгтæбæл изгæ бадун байдæдта, æ ком смаг кæнун райдæдта. 'Ма неци бакæндзæнæн уæхæнмæ фæккæсунмæ.
    Уотемæй бабæй уони дæр рарвиста фæстæмæ. Уæд Æхсæртæгкатæ загътонцæ, мадта Сослани рарветæн, уомæй ба ма ци зæгъдзæнæнцæ уæд, зæгъгæ. Уосгори рæвдзæ искодтонцæ Сослани. Нарти фæсевæди хуæздæртæй ин дууадæс æ хæтдзæ рарвистонцæ. Ниццудæнцæ. Йетæ дæр бабæй бафусун кодтонцæ уæхæн гъæздуг лæгмæ. Минæвæрттæ сæ хæтдзæ райстонцæ сæ фусуни кегъæреæн. Бацудæнцæ, салан равардтонцæ Адæкези хæтдзæ кæрæдземæн. Сослани бустæги бастудтонцæ минæвæрттæ. Сослани тасæй Адæкез «нæ» зæгъун нæ бандиудта, фал, мæн фæндуй, зæгъгæ, загъта. Фал, зæгъгæ, æ унаффæ кизгæн æхемæ 'й. Уæд сæмæ Уæзæвтауæ æхуæдæг дзоруй:
    – Нæ мади хъæбæр ке фæндуй, уой зонун, уæдта, уадзæн Нарти Сослан загъдæуй, уомæй лæгъуз ка зæгъдзæнæй. Фал дуйней царди медæгæ алкедæр цæрун фæндуй. Зонгæ-зонгæй æвæстаг ун ке бафæнддзæнæй? Сослан æй тухгин лæг, мæнгард лæг. Мæнгардæн ба æ фæстаг лæгун фæккæнуй. Барвæндæй æз мæхе æвæстаг нæ фæккæндзæнæн.
    Сæ бæрæг базудтонцæ минæвæрттæ. Фестадæнцæ, рандæнцæ сæхемæ мæтъæлæй. Йеци хабар Æхсæртæгкатæн уомæй дæр зиндæр адтæй. Мадта уæдта загътонцæ, а нин зæронди рæуæндтæ кæнуй, фал имæ рарвистонцæ Хæмици фурт Батрази. Дууадæс æмбалей хæтдзæ бабæй етæ дæр ниццудæнцæ. Æрфусун кодтонцæ гъæздуг лæгмæ. Сæ фусуни райстонцæ сæ хæтдзæ, уотемæй бацудæнцæ минæвæрттæ Адæкези хæдзарæмæ. Æрдзурдтонцæ бабæй минæвæрттæ. Хъæбæр бастудтонцæ бабæй йетæ дæр Æхсæртæгкати. 'Ма бабæй загъта Адæкез, цæмæннæ бæззунцæ Æхсæртæгкатæ мæнæн, бæззунцæ нин. Фал кизгæн æ унаффæ æхемæ 'й, зæгъгæ.
    Кизгæ сæмæ дзоруй:
    – Сумах мæнмæ кæсетæ дзуапп æнгъæл, 'ма уин зæгъдзæнæн, – Хæмици фурт Батраз хуарз лæхъуæн æй. Æй æхсаргин. Æ кой ахид цæуй. Фал цæрун кенæ фæндуй. Зонгæ-зонгæй адзалмæ ка бацæудзæнæй. Æ цъифхуар мадæ авд рæхисемæй къоли сæри бастæй лæууй. Æма æхседæн зингитæ æ комæй хæрдмæ калуй. 'Ма мæбæл уонæй йеу æсгæрнæг ку 'рбахауа, уæддæр бунсугъд бакæндзæнæн. 'Ма нæ цæун Батразмæ.
    Сæ бæрæг базудтонцæ и минæвæрттæ, фестадæнцæ. Хъæбæр фæммæтъæл æнцæ, уотемæй исцудæнцæ сæ хæдзарæмæ. Нæуæгæй баунаффæ кодтонцæ Æхсæртæгкатæ.
    Мадта нæмæ Деденæги фурт Ерæхцауæй рæсугъддæр, хуæрзконддæр нæййес, 'ма сæмæ уой рарветæн. Хуæздæр къуар ин искодтонцæ. Бай¬рæвдзæ кодтонцæ. Дууадæс æмбалей хæтдзæ 'й рарвистонцæ. Ниццу¬дæнцæ, йетæ ба йеу хæдзарæмæ æрфусун кодтонцæ. Райстонцæ сæ фу¬су¬ни сæ хæтдзæ, уотемæй ниццудæнцæ. Дзорун райдæдтонцæ Адæкезæн:
    – Нуртæккæ Нарти астæу уадзæн Æхсæртæгкатæ загъдæуй, Деденæги фурт Ерæхцау, æ конд æ уиндæн нæййес. Алкæци хузи дæр бавдесунмæ бæззуй, уæхæн лæхъуæн æй, гъе, йе дин дæ кизги коруй.
    – Æз ибæл арази дæн, – загъта Адæкез, – сумах æй куд дзоретæ, уотæ 'й æз дæр игъосун. Фал унаффæ кизгæн æхемæ 'й.
    – Æз уин зæгъдзæнæн, – дзоруй Адæкези кизгæ Уæзæвтауæ, – Деденæги фурт хуæрзконд лæхъуæн æй. Байæстудтайтæ хъæбæр. Фал йе 'нбæлтти астæу ном некæдма искодта. Кизгарæзт лæхъуæн æй. 'Ма уомæ дæр нæ фæццæудзæнæн.
    Раздагъдæнцæ Æхсæртæгкатæ йеугур æздæхт. Йеугур Нартæ базудтонцæ, Æхсæртæгкатæмæ Адæкези кизгæ Уæзæвтауæ нæ бакумдта, зæгъгæ. Æхсæртæгкатæн сæ сæр фæниллæгдæр æй.
    Йеу æхсæвæ кæми адтæй, уоми Ацæти Ацæ æ уосæмæ дзоруй:
    – Не 'фсинæ, йеу гъуддаг мæ сæрмæ æрцудæй.
    – Ци гъуддаг? – зæгъгæ, фæрсуй и уосæ.
    – Адæкезæн дæр ес йеунæг кизгæ, махæн дæр йеунæг битдзеу, 'ма сæ, байеу кæнæн, – зæгъгæ.
    – Бæргæ-бæргæ, – загъта уосæ, – Хуцау ку раттидæ! Фал Æхсæртæгкатæ уалемæй фæккоргæй, уони ка раздахта, махæн ба ци зæгъ¬дзæнæй?
    – Йе ба неци кæнуй, – зæгъгæ, Ацæ сæумæ раги ралæуирдта 'ма æ бæх фæййефтигъта.
    – Не 'фсинæ, сехуар мин, æз ба тагъд уайон.
    Сехуар ин февардта, 'ма расехуар кодта. Бæхуæрдуни æхе багæлста 'ма сæпп-сæппæй рандæй. Нарти нихаси 'руадæй. Æхсæртæгкати хестæртæ, Нарти хестæртæ нихаси бадтæнцæ. Фæрсунцæ 'й:
    – Ацæ, цирдæмæ? Бæхуæрдунæй ку уаис!
    – Адæкези кизгæ Уæзæвтауи мæ лæхъуæнæн ракоринæ, – зæгъгæ, дзуапп равардта Ацæ.
    Къæл-къæлæй ниххудтæнцæ Æхсæртæгкатæ. Дзорунцæ имæ:
    – Дæ нихъхъæртун дæ зин æй, дзоргæ дæ бæхмæ, – зæгъгæ.
    Уотемæй фæууайуй сæпп-сæппæй Ацæ. Æ фæсте ходунцæ, нуртæкки куд фездæхдзæнæй, уой фæууиндзинайтæ, зæгъгæ.
    Нихъхъæрттæй Ацæ мæсуги рæбунмæ. 'Ма мæсуги рæбун æ бæх фæууæгъдæ кодта, æ бæхæн хуæруйнаг февардта бæхуæрдуни хурфи. Кегъæре дæр нæ, минæвар дæр нæ, неке байагурдта. Уотемæй хæдзари исмедæг æй. Кегъæрей хузæн æрбадтæй, уотемæй Адæкези хæтдзæ дзубанди кæнун байдæдтонцæ. Кæрæдзей фæрститæ кæнунцæ. Хуæрзидзаг фингæ ин æрбайвардтонцæ. Рахуардта, раниуазта, æхе æрбафсаста. Уæдта дзоруй Адæкезмæ:
    – Æдосæ не 'фсини хæтдзæ баунаффæ кодтан, Адæкезæн дæр йеунæг кизгæ, махæн дæр йеунæг битдзеу æма сæ байеу кæнæн, зæгъгæ. Уой туххæй дæмæ æрцудтæн.
    Адæкез загъта:
    – Хуарз, фал æз уомæн неци исунаффæ кæндзæнæн. Æхсæртæгкатæ нæмæ фæццудæнцæ кезугай, æма сæ Уæзæвтауæ æхуæдæг раздахта фæстæмæ. Нур дæр мæнмæ нæй унаффæ, æхе ин бафæрсæ.
    – Йа, дæ рун бахуардтон, Уæзæвтауæ, йести дзæбæх мин зæгъæ, – дзоруй Ацæ Уæзæвтауæмæ.
    Уæзæвтауæ загъта:
    – Сумах мæнмæ дзуапп æнгъæл кæсетæ?
    – Кæсæн, кæсæн, дæ рун бахуардтон, – дзоруй имæ Ацæ дæр.
    – Мæ мадæ уой хъæбæр зонуй, – зæгъуй Уæзæвтауæ, – мæн кæмæ нæ фæндæуа, уомæ ке нæ фæццæудзæнæн, уой. Æма мин унаффæ уомæй мæхемæ дæттуй. Æз цæттæ, сумах ци зæгъетæ, уобæл арази.
    Ацæ æма Адæкез сæ кæрæдзей къохтæ райстонцæ.
    – Фæххаир уæд гъуддаг, – зæгъгæ.
    Ацæ дзоруй Уæзæвтауæмæ.
    – Гъа, мæ ностæ, дæ рунтæ бахуардтон, дæхе æрбарæвдзæ кæнæ.
    – Нуртæккæ, – зæгъгæ, Уæзæвтауæ æхе рарæвдзæ кодта. Дзаума¬уæй, хъæппæлæй ин цидæр адтæй, уони уæрдуни рацурхтонцæ. Ацæ разæй рабадтæй, Уæзæвтауæ ба фæстегæй, уотемæй фæццæунцæ. Хор рафтуйæ-рафтуйæ кодта, уотемæй Нарти нихаси сæпсæпгæнгæ æрцудæнцæ. Уоми ци адæм адтæй, йетæ нæ, фал ма, нигки уордæмæ ка 'рцудæй, уонæн дæр йетæ радзорионцæ, мæнæ зæгъгæ, Ацæ æ фуртæн Уæзæвтауи корунмæ рандæй. Нуртæккæ æрбацæудзæнæй. Цума куд уодзæнæй, ци дзуапп райсдзæнæй.
    Ацæ æма Уæзæвтауæ нихасбæл ку 'рбацудæнцæ, бæхуæрдуни бадгæй, уæд Ацæ дзоруй:
    – Уе 'зæр хуарз, Нарти зæрæндтæ!
    – Хаир дин фæууæд, хаир, – зæгъгæ, загътонцæ Нарти хестæртæ.
    Æхсæртæгкатæй дзоргæ дæр некебæл искодта. Уотемæй Ацæ æ фурт Ацæмæзæн æрхудта Адæкези кизгæ Уæзæвтауи.
    
    
Радзырдта йæ Хъаирты Емæза, 52-аздзыд, 8 февраль, 1941 аз, Цыкола. Ныффыста йæ Хæмыцаты А.
    ЦИГСИИ-йы архив, фольклор № 77, папкæ 29, ф. 110–115.

    
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

    
при использовании материалов сайта, гиперссылка обязательна

Вернуться назад
Рейтинг@Mail.ru