Главная > Нарты кадджытæ > Нарти Сирдони тауæрæхъ

Нарти Сирдони тауæрæхъ


13 июня 2010. Разместил: 00mN1ck
    Сирдонмæ адтæй еунæг гæбæр гъог. Еу бон кæми адтæй, уоми æ гъог гъазгæ кодта, 'ма изæрæй æ фæсте къуар богъай æрцудæй. Сирдон сæ истойни бакодта, æхуæдæгка æ уосæмæ бауадæй 'ма ин загъта:
    – Уæртæ нæ гъог аци бон цал уæси низзадæй, уомæ-ма ракæсæ.
    Уосæ дæр рауадæй æма сæбæл фæццийнæ кодта:
    –'Цæгæй, – зæгъгæ, – нæ гъог цал уæси низзадæй, уæдта цæййæстæ 'нцæ!
    Уæд сæумæ, богъатæ ке адтæнцæ, е сæ агоргæ кодта, 'ма сæ Сирдони истойнæмæ бауидта.
    – Мæ богъатæ мин, – зæгъгæ, – рауадзетæ!
     Сирдон ба ин уотæ:
    – Дæуæн ами богъатæ нæййес, уони, – зæгъгæ, – мæхе гъог кæддæр-уæддæр низзадæй, ду ба мин сæбæл дауæ кæнис.
    Богъати хецау ба ин загъта:
    – Мадта, кæд дзæгъæл дауæ кæнун, уæд мæ хæтдзæ рацо дæлæ фасти хадзимæ 'ма нæ гъуддаг уоми равзардзинан.
    Сирдон ба ин загъта:
    – Æз фасти хадзимæ фæццæунмæ неци бакæндзæнæн, уой туххæй æма ду замманай цъæх саулох бæхбæл бадис, кæрцæй-æндæрæй ба ефтонг, æз ба атемæй мæ гебенати хæтдзæ, 'ма, ай-гъай, фасти хадзи дæр уотемæй дæу гъуддаг кæндзæнæй, мæн ба хæран кæндзæнæй
    Богъати хецау Сирдонæн берæ фæллигъстæ кодта, уæдта ин фæстагмæ загъта:
    – Мадта мæнæ мæ бæхбæл рабадæ, æз ба фестæгæй цæудзæнæн.
    Уæддæр ин Сирдон нæ бакумдта:
    –Дæ кæрцæ дæр-ма мин раттæ, кенæдта нæ цæун.
    Гæнæн нæбал адтæй, 'ма бабæй ин богъати хецау æ кæрцæ дæр равардта. Уотемæй Сирдон цъæх саулох бæхбæл, кæрцæй-æндæрæй ефтонгæй, богъати хецау ба фестæгæй æнæ кæрцæй, æрцудæнцæ фасти хадзимæ сæ гъуддаг равзаруни туххæй. Фасти хадзи фæрсуй богъати хецауи:
    – Гъи, ци хабар дæмæ ес? Цæбæл гъаст кæнис?
    Е ба загъта:
    – Сирдонæн æвæдзи æ гъог гъазгæ кодта, 'ма мæ богъатæ æ хæтдзæ æрцудæнцæ, нур ба мин сæ нæбал дæттуй, мæхе гъог сæ низзадæй, 'ма мæхе 'нцæ, зæгъгæ.
    Сирдон дæр нæбал фæллæудтæй 'ма фасти хадзимæ дзоруй:
    – Гъенур мин аци лæг мæ бæхбæл дæр æрдауæ кæндзæнæй.
    Богъати хецау ба дзоруй:
    – Ма бæх дæр, – зæгъгæ, – мæн æй.
    Сирдон дæр бабæй дзоруй:
    – Гъенур дин нæ загътон, нур мин айæ мæ кæрцæбæл дæр æрдауæ кæндзæнæй.
    Богъати хецау дæр бабæй дзоруй:
    – Ма кæрцæ дæр, – зæгъгæ, – мæн æй.
    Уæд Сирдон дзоруй фасти хадзимæ.
    – Гъенур комкоммæ æ мæнгæттæ не сбæрæг æнцæ? Фитдзаг мин мæ гъоги уæситæбæл дауæ кодта, нур ба мин, дæхе цæстæй уингæй, мæ бæхбæл дæр æма мæ кæрцæбæл дæр дауæ кæнун райдæдта.
    Фасти хадзиæй дæр æцæгдзинадæй Сирдони дзубанди баирагæс æй. Айæ – зæгъгæ, – 'цæгæй, фитдзаг айдагъ уæситæбæл ку дауæ кодта, нур ба ин æ бæхбæл дæр æма æ кæрцæбæл дæр дауæ кæнун ку райдæдта.
    'Ма фасти хадзи уæситæ Сирдонæн ратæрхон кодта.
    Уотемæй Сирдонæн байзадæнцæ есге уæситæ дæр, бæх дæр, уæдта кæрцæ дæр.

Радзырдта йæ Мудойты Мæхæмæт. Ныффыста йæ Толасты Андрей, 4 мартъи, 1927 аз, Чырыстонхъæу.
ЦИГСИИ-йы архив, фольклор № 15, папкæ 8, ф. 240–241.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад
Рейтинг@Mail.ru