Главная > Историон æмæ тохы зарджытæ > 15. КÆСГОН ÆЛДАРИ ЗАР

15. КÆСГОН ÆЛДАРИ ЗАР

27 ноября 2007. Разместил: 00mN1ck

(вариант)

Кæсгон æлдар Тотури гурд дууæ сау гали
Сау сиутæ сугъзæринæй исастардта.
Алли 'рдæмæ йе 'рдхуæрдтæмæ рарветуй:
— Мæнæн уæхæн æрдхуард æнгарæ
Кæми разиндзæнæй?
Биндзи мæйти мæнæн мæ дууæ сау гали
Æнæ биндзæ зæнхæмæ ка бакæна?
Хъарадзаутæ рагæй æносмæ дæр
Номбæл мæлагæ адтæнцæ.
Хъарадзаути Сафарали йимæ рарветуй:
— Æз дин сæ бакæндзæнæн
Тæторси цæгатмæ æнæ биндзæ зæнхæмæ.
Ба-йин сæ кæнуй Донифарси зæнхæмæ,
Тæторси цæгатмæ.
Йеу бон кæми фæууй,
Уоми Хъанухъти Есе
Мæсуги сæргкагæй кæсæнцæститæй
Гъæуай кæнун байдайуй
Зæнхи къабæзтæмæ.
Тæторси цæгатмæ бæргæ фæууинуй
Дууæ сау гали.
— Ци дессаг æй? Ацал-ауал бони мин
Мæ зæнхæмæ маргъ æрбатæхун
Ку некæд бандиудта?
Ма рауахтæ кæстæртæ,
Æ'рсæ-кæнетæ!
Æрсæ-кæнунцæ.
Дигори кæмтти дестæ-тамæстæ
Кæнун байдайунцæ.
— Ци 'й а? Ци дессаг æй?
Еунæг хорæй уæлдай
Ку некæд уидтан,
Донифарси сæри цуппар хори
Кæсун ку байдæдта.
Хъанухъти Есе сæ устур мæсуги буни
Æрæвгæрдуй циргъесæйнагæн.
Хъарадзаути Сафарали сæ
Къуæрейæн бæрæг ку кодта.
Нæ бал сæ иссеруй.
Кæсгон æлдармæ фæххабар кæнуй.
Кæсгон æлдар йе 'фсæдти хæтдзæ æрбацæуй.
Морги æхсæвеуат æркæнуй.
Довифарсмæ рарветуй устур Есемæ:
— Æнæ мастæй мин мæ дууæ гали,
Ке нæ ба уæдта тохгæ кæнун.
Ра-йимæ æрветуй:
— Кæми æрбацудтæ, уоми ме 'уазæг дæ,
Фусун нæмæ бакæнæ,
Дæ галтæ дæр дин раддзинæн.
Сехуарæн дин дигурон кæрдзин цигъди хæтдзæ:
Æхсæвæрæн дин æлотон бæгæни фиди хæтдзæ,
Кæд лæгъуз иуазгутæ айтæ,
Уæд уæ бакæндзинæн
Мæсуги буни арф æскъæти
Хъозити гъоло'н хути хæтдзæ.
Уалæнги кæсгон æлдар
Хъувгъани хæтдзæ рацудæй.
Хъанухъти Есе йимæ мæсугæй
Хъæрæймаг радаруй.
Хъувгъан ин æ къохи фæххауин кæнуй.
— Гъæдт, мæ кæстæртæ, мæ саргъ æвæретæ!
Ледзæг йе фæууй,
Ами хуарз хабар нæййес! — зæгъгæ.

ЦИНИИ-йы архив, фольклор № 126, папкæ 12, ф. 72—74.

«ИРОН АДÆМЫ СФÆЛДЫСТАД». Фыццаг том. Салæгаты Зоя. Орджоникидзе 1961.

при использовании материалов сайта, гиперссылка обязательна

Вернуться назад