Ой, ой,Цæразоны-фырт,
Ой, йæ фæллад галтимæ,
Ой, ой, уæрæйдæ,
Уæй, тох, æмæ Цъыфджыны нарæгмæ
Куы 'рбахæццæ,
Мæнæ тох!
Ой, Цæразоны-фырт, зæгъы,
Ой, йæ фæллад галтыл
Ой, йæ уарзон хъæубæстæм
Ой, тох æмæ йе 'ххормаг бинонтæн
Хъæбæрхор куы ласта,
Мæнæ тох!
Ой, Цъыфджыны тархъæдæй, зæгъы.
Ой, абырджытæ, уæдæ,
Ой, ой, уæрæйдæ,
Уæй, тох, æмæ абырджытæ рауади,
Абырджытæ, загъта,
Мæнæ тох!
Ой, хæххон Аким,
Ой, рауæгъд-ма кæн, ей.
Ой, ой, дæ галты,
Уæй, тох, æмæ мах, дам, сæ ныргæвдæм
Физонджытæн, уæдæ,
Мæнæ тох!
– Ой, цæуылнæ мæ ауадзут,
Ой, мæ фæллад галтимæ,
Ой, ой уæрæйдæ,
Уæй, тох, æмæ ме 'ххормаг бинонтæн
Хæринаг куы ласын,
Мæнæ тох!
Ой, мæ къобор галты
Уæхæдæг суæгъд кæнут,
Ой, уæрдонæй, уæдæ.
Ой, тох, æмæ топп уæд куы райхæлдта,
Ой, Тотийы фырт Аким,
Мæнæ тох!
Ой, хъæбатыр Аким, уæдæ,
Ой, гæрæхтæ райдайы,
Ой, ой, уæрæйдæ,
Уæй, æмæ æцæг райдайы,
Ой, хъæбатыр Аким,
Мæнæ тох!
Ой, уæдæ та, зæгъы,
Æртæ абырæджы
Ой, зæхмæ æрхаудтой.
Ой, тох, æмæ Аким дæр фæцæф ис
Къардиуы фæстейæ,
Мæнæ тох!
Ой, Уæлладжыры фæндаг мын,
Ой, комæй, дам, рабарстой,
Ой, ой, уæрæйдæ,
Уæй, тох, æмæ Цæразоны-фырты
Бонæй, дам, рамардтой,
Мæнæ тох!
Ой, уæдæ, загъта;
Хетæджы кувинаг
Дæллаг цъасы бынты.
Ой, тох, æмæ нæ ратдзынæн уæдæ
Мæ фыды цъæх галы,
Мæнæ тох!
Ой, ацы Карца мын, загъта,
Ой, кæрисы нæ цæуынц.
Ой, ой, уæрæйдæ,
Уæй, тох, æмæ Уæлладжыры комæй
Фæдисы нæ цæуынц,
Мæнæ тох!
Уыналы сæрмæ,
Ой, Гæбис сæргъгæнæг,
Дзæнæты фæбадай,
Уæй, тох, æмæ Цæразонты Аким,
Уæй, чысыл сахъ Аким,
Мæнæ тох!
Ой, загъта, уæртæ Нузалмæ
Ой, уæдæ чи фæцæудзæн,
Ой, ой, уæрæйдæ,
Уæй, тох, æмæ фæдис хъæргæнæг,
Мæ диссаг дзурынмæ?
Мæнæ тох!
Радзырдта йæ Хъесаты Гадзыбе. Ныффыстой йæ Плиты Харитон æмæ Дарчиты Дауыт, 28 август , 1936 аз, Захъа.
ЦИГСИИ-йы архив, фольклор № 25, папкæ 71, ф. 22–24.
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.
при использовании материалов сайта, гиперссылка обязательна |
