Главная > Историон æмæ тохы зарджытæ > Сари Аслæнбеги зар (вариант)

Сари Аслæнбеги зар (вариант)

24 декабря 2010. Разместил: 00mN1ck

(вариант)

Дæлæ коми думæги хæрæ мегъæ æрбацæуй.
Йе хæрæ мегъæ нæ уодзæнæй,
Фал Сари Аслæнбеги æфсæдти бæхти коми тулфæ ку уодзæнæй.
Æфсæдтæн сæ сæрти тæхунцæ сау халæнттæ.
Йетæ дæр сау халæнттæ нæ уодзæнæнцæ,
Фал, æфсади бæхти къæхтæй хæрдмæ ци сигити къубæрттæ æсхъеуй,
Йетæ ку уодзæнæнцæ.
Æфсадæн сæ разæй æрбацæуй æртæ 'фсæнцъух берæгъи.
Йетæ дæр æфсæнцъух берæгътæ нæ уодзæнæнцæ,
Уонæй астæуггаг ку уодзæнæй Хъайтухъи-фурт Сари Аслæнбег.
Æрбацæуй æ галти мæстæй Хъанухътæмæ хъалон йесунмæ.
Уомæн æ рахес фарсæй мистрагъ цагъдибæл бадуй адæнхуар
Хъарадзауи фурт Сафаралий.
Æ галеу фарсæй устур тæрæнбæл Бийи-фурт Муртазалий,
Уæлæ Мисигони дони сæри уорссæр цæргæс уæд ку 'рбадуй йе 'фсæдти хæтдзæ.
Донифарс дæр фæндæ 'ма фæнди сæртæ кæнун уæд ку райдайунцæ.
Уонæн сæ рæгъæг уæд ку адтæй Хъанухъи-фурт устур Есе
Сæумæ, зæгъуй, Сари Аслæнбег æхе гъуди уæд ку рацæуй æ хъувгъани хæтдзæ.
Хъанухъти Есе æй мæсуги сæрæй æ мадзæйрагæй уæд ку фехсуй.
Хъувгъанæн ма Сари Аслæнбеги къохи ку райзайуй айдагъдæр æ хуæцæн.
Уой фæсте сæмæ Донифарс ку рарветунцæ:
«Ранæмæхæстæг уо, бадинхуæрун кæндзинан Мисигони хуарæй хулутдзаги кæрдзин.
Таторсон уорсагæй, хъæбæргомау цæхгун цигъд,
Уобæл ку нæ банвæрсай, уæд дин æвæрдзинан нæ уорс дзолæй фиди хæтдзæ,
Кенæ ба сæресгæ æхцин муди хæтдзæ.
Йе дæр дæ зæрдæмæ ку нæ бацæуа,
Уæдта дæ бакæндзинан Хъозити бунггæгти хути хæтдзæ.
Уотемæй дæ рарветдзинан устургомау фуди хæтдзæ.
Махæн нæ цард нæ мосæй æй.
Афойнадæбæл ку нæ райсай дæхе,
Уæд дæ нæ астæумæ æрласдзинан цæу ласæгау дæ гъосæй.
Хъарадзауи-фурт, дæуæн ба, Хъайтухъи-фуртæн тухæй ка нæ бантæстæй,
Уой ин банхæст кæнæ дæ уосæй.
Махæн нæ фонси хезнæ тæторс æй,
Хъарадзау-фурт, дæуæн уомæ кæсунæй дæ сау рехе æмæ дæ рахес цæстæ исорс æй.
Бийи-фурт, дæуæн ба Донифарс кæнунцæ æлдари фæдбæл куййау хæтун ходуйнаг».
Сари Аслæнбег сæргубурæй уæд ку рандæ кæнуй йе 'фсæдтæ ходуйнаги хæтдзæ Донифарсæй.

Радзырдта йæ Хъараты Мырзабег, 4 август, 1933 аз, Лескен. Ныффыста йæ Цъеуты Израил.
ЦИГСИИ-йы архив, фольклор № 20, папкæ 70, ф. 18–19.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад