Главная > Хицæн кадджытæ > Уæхадæги фурт мæнгæй Гуймани зар (вариант)

Уæхадæги фурт мæнгæй Гуймани зар (вариант)

16 декабря 2010. Разместил: 00mN1ck

(вариант)

Æстур Дигорæ æстур нихæси æстур æмбурд адтæнцæ.
Уорси сæрæй сæмæ уорс Елиай гæрæхтæ игъусуй,
Æд кæстæр æд хестæр æстур æмбурд уогæй дестæ-тæмæстæ кодтонцæ:
Ауæхæн хор ирд бони циуавæр Елиай гæрæхтæ æнцæ?
Уонæн сæ хестæр зонæнгин адтæй:
«Дес ма кæнетæ, Елиай гæрæхтæ нæ уодзæнæнцæ,
                                   цауæйнони хæтæли гъæртæ 'нцæ».
Уæд сæмæ сæ кæстæртæй æрбахабар уй:
«Айсоми Уæхатæги фурт мæнгæй Гуйман цауæни исевгъудæй сау хонхмæ».
«Бæрæг кæнун æй гъæуй, 'ма ка бабæрæг кæна?», – сæ хестæртæ дзорунцæ.
Туали фурт Хъасболат загъта.
«Æз æй бабæрæг кæндзæнæн».
Уайунтæ имæ байдæдта 'ма имæ исхъæрттæй.
Куйдари бæрзондбæл, сау айнæги сæри,
                                   уорс сиутæ сау дзæбодур кæстау кодта Гуйман.
Дзоруй имæ Хъасболат:
«Берæ дин Хуцау раттæд, Уæхатæги фурт мæнгæй Гуйман».
Мæнгæй æй ке худта, йе имæ гъулæг фæккастæй,
Дзоруй имæ йе дæр:
«Йеумæ нин æй Хуцау равардта, Туали фурт кисил Хъасболат».
«Дæ цæттæ сирдæн тас нæбал æй, фал дæлæ сау айнæги буни уорс сиутæ
                                   дууæ сау дзæбодури хезуй».
Цауæйнони зæрдæ нæрæмон кæми нæ фæууй,
                                   фæууагъта æ сирди мард 'ма имæ дзоруй Гуйман,
«Кæми?», – зæгъгæ.
«Дæлæ сæ билæй ниууиндзæнæ, сау айнæги буни хезунцæ».
Билæмæ бацæуй:
«Кунæ мæмæ зиннунцæ».
«Дæхе ниддæлгоммæ кæнæ 'ма сæ уæд ниууиндзæнæ».
«Рахаудзæнæн», – дзоруй имæ.
«Ма тæрсæ, дæ думæггагбæл дин хуæцдзæнæн æз».
Уæд сæ ниууинуй, 'ма æ топпи фелхъивди хæтдзæ 'й билæй
                                   рансонуй Хъасболат.
Куйдари бæрзондбæл йеу сау хой низзелæнтæ кæнуй,
Сау хой нæ уодзæнæй, Уæхатæги фуртæн æ сау Селæн æ хæтдзæ адтæй
                                    'ма йе уодзæнæй.
Куцæй æй рагæлста, уордигæй сау айнæги билæй æ сау Селæн сансау
                                   хуæцгæ ниццудæй.
Куйдари адаги думæги æй иссеруй,
Æ сау дзæмбуæй æй батилдта, ку нæ ин исæзмæлуй, æртæ хатти ниннеуй,
Æ дууæ сау дзæмбуй æ дууæ сау росеми æртæ хатти уæд ниссадзуй,
Уæд æй ниууагъта 'ма уайун байдæдта,
Æмбесæхсæви æ хæдзари дуармæ бахъæрттæй, æртæ хатти ниннеуй,
Æ сау ниййерæг рауайуй:
«Нæ цауæйнонбæл цидæр æрцудæй», – зæгъгæ.
Æ сау силæ 'й сау дзигготæй ниййахæссуй:
«Æмбесæхсæви гъæр ма кæнæ», – зæгъгæ.
Мади зæрдæ тæнæг æй, æхе ратудта 'ма ниффæдес кодта.
«Сау халон – гъæргæнæг, сау силæ – фæдесон».
Зменсæ æ мæрддзаг, кæсалгæ æ мæрддзогойнæ, уотемæй æй байвæрунцæ.
Хъодзастæмæ Гоба адтæй,
Уæхатæги фурт мæнгæй Гуйман
Сирди мæрдтæ хæссунмæ донбай адтæй.
Мæрдти дзенети фæббадæд, дзенет ин Хуцау раттæд.

Радзырдта йæ Тобойты Цицеу Дзæрæхмæты фырт, 5 апрель, 1927 аз, Чырыстонхъæу. Ныффыста йæ Толасты Андрей.
ЦИГСИИ-йы архив, фольклор № 15, папкæ 8, ф. 311–312.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад