Главная > Историон æмæ тохы зарджытæ > Мисирбий зар

Мисирбий зар

8 января 2011. Разместил: 00mN1ck

Баделиатæ рамбурдæнцæ, Баделиатæ,
Хусфæрæги, дууæ тагей астæумæ,
Даргъ бæласи цормæ сæ бунат.
Фæндæ æма фæнди сæртæ
Уой, уой, ку кæнунцæ:
– Цæйтæ, рагæй ардæмæ фонсгæнæг
Нæма фæцан æма фонс фæккæнæн!
Æртæ къуарди фæцæнцæ,
Еу къуард уотæ зæгъуй:
– Арви коммæ фæццæуæн!
Иннæ къуард бабæй уотæ загътонцæ:
– Курттати коммæ фæццæуæн!
Æртиггаг къуард ба загътонцæ:
Уæллаг Ири коммæ фæццæуæн!
Нæ бафедудтонцæ æма лæгтæ исистонцæ
Хъарадзаути Мисирбий æма Галати Мæхæмæти:
– Фæццотæ нин Туйгъантæмæ,
Хъæрæу Айдемури хæтдзæ бадзубанди кæнтæ;
Айдемур нæ кумæ æрвета,
Уордæмæ куд фæццæуæн.
Уобæл ард бахуардтонцæ,
Айдемурæн загътонцæ:
– Дигори баделиатæ æрæмбурдæнцæ;
Фонс фæккæнун сæ фæндуй,
Рагæй фонс некæми ма фæккодтан,
Нурба нин баунаффæ кæнæ!
Е ба загъта:
– Кæд мæммæ игъосетæ,
Уæд ниууагъта аци гъуддаг!
Мисирби ин загъта:
– Ниууадзæн ин нæбал ес!
– Мадта ин кæд ниууадзæн нæбал ес,
Уæдта уæ кумæ фæндуй, куд зæгъетæ?
– Бæрæг фæндон нин нæбал ес,
Æртæ къуарди фæцан,
Нæбал федауæн.
– Мадта уæ уæддæр кумæти фæндуй?
Бафарста сæ
Етæ ба ин загътонцæ:
– Арви коммæ нæ еуети,
Аннæ къуард ба Курттатæмæ,
Æртиггаг къуард ба Уæллаг Ирæмæ.
Уæдта син Хъæрæу Айдемур загъта:
– А уæу-уай, нийуадзетæ!
Кæми й нæ уадзетæ,
Уоми ба уæ Арви коммæ рарветинæ,
Ма коми думæгмæ урус ниббадтæнцæ,
'Ма неци рахæсдзинайтæ,
Курттатæмæ уæ барветинæ,
'Ма уордиги дæр неци рахæсдзинайтæ:
Кæддæриддæр сæ фæдесон адæн тухгин æнцæ,
Уордæмæ дæр уæ не 'рветун:
Уæллаг Ирæмæ уæ барветинæ,
Уæллаг Ирæй дæр неци рахæсдзинайтæ:
Сæ бацæуæнтæ унгæг æнцæ.
Уордæмæ дæр уæ не 'рветун.
Кæд мæ коммæ кæсетæ,
Уæд уæ Биаслантæмæ æрветун:
Фонс дæр иссердзинайтæ,
Рамæлунмæ дæр уе 'нхузон адæн.
Хъæрæу Айдемурæн раарфæ кодтонцæ.
Дууæ лæги 'ма раздахтæнцæ.
Ку рацох æнцæ,
Уæд Мисирби загъта Мæхæмæтæн:
– Дууæ хæлари ан æз æма ду;
Æз ке зæгъон, уой ке зæгъдзæнæ,
Уобæл мин ард бахуæрæ!
Ард ин бахуардта, зæгъдзæнæн, зæгъгæ.
– Мадта нæ Уæллаг Ирæмæ
Хъæрæу Айдемур æрветуй, уой зæгъæ.
Иссудæнцæ æма æмбурди разагътонцæ:
– Хъæрæу Айдемур нæ Уæллаг Ирæмæ æрветуй.
Ранæхстæрæнцæ.
Сæ бацæуæн бон мегъæ адтæй,
Тугъди бони Туйгъанти минги Дударихъойæн
Сугъзæринæй рехæ адтæй.
Уæллаг Ири нигъгъæр кодтонцæ:
– Цъæх лацин æрбацæуй, цъесцъесгæнгæ.
Цъæх лацин нæ уодзæнæй, фал ка уодзæнæй?
Туйгъанти минги бæгъатæр Дударихъо ку уодзæнæй.
Уæллаг Ирæн сæ донхæссæн сæ гæбæти æй,
Уомæн æ фæсте ка цæуй,
Йе ба Галати бæгъатæр Мæхæмæт æй.
Уой фæсте ба бор уари æрбацæуй, пæрпæргæнгæ,
Йе ба ка уодзæнæй?
Хъубадти бæгъатæр Бор-Бекмæрза ку уодзæнæй.
Уой фæсте ба сунт æрбацæуй.
Йе сунт нæ уодзæнæй,
Фал Дзагурти бæгъатæр минги Будзу ку уодзæнæй.
Уой фæсте ба къуру уæйуг
Гуппитæгæнгæ рацæуй.
Къуру уæйуг нæ уодзæнæй,
Фал Салæдти* бæгъатæр къуру Гæуис ку уодзæнæй,
Уæллаг Ирæн сæ донхæссæн сæ гæбæтæй.
Уомæн æ фæсте ка цæуй,
Е ба уомæн æхе фурт бæгъатæр Мæхæмæт æй.
Уæллаг Ири тохæгдæр Бутати Бзарихъо,
Кæсæги лæхъуæнтæн ба сæ хуæздæр Муртазти Дударихъо.
Бизи уоститæ фæлледзунцæ æд гоппитæ,
Кæсæги фæлмæн лæхъуæнтæ фæккалдтонцæ
Сæ къохтæй сæ топпитæ.
Дæлæ, зæгъуй, фæлледзуй
Зайуйнаг къамбец, лæпплæппгæнгæ.
Зайуйнаг къамбец нæ уодзæнæй,
Фал Зурабти Батæрса ку уодзæнæй.
Бизибуни тугъд ци дессаг æй,
Зурабти Батæрса нигъгъæр кæнуй:
Мæкъури цæф ци ресагæ 'й!
Нæуæг хунд киндзæ фæццæуй пихсбунти.
Нæуæг киндзæ нæ уодзæнæй,
Фал Хъубадти хъæрабогъæ Хъасай ку уодзæнæй.

Радзырдта йæ Тугъанты Тæтæрхъан. 11 январь,1921 аз, Дзæу¬джыхъæу. Ныффыста йæ Дзагурти Губади.
ЦИГСИИ-йы архив, фонд Дзагурова Г.А., оп.1, папка 13, ф.129–132.

Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.

при использовании материалов сайта, гиперссылка обязательна

Вернуться назад