Уæртæ Туйгъанти къулух Æсмали æ цъæх бæхбæл ку рабадтæй æма Курттатæмæ ку бацудæй æмбесæхсæви æма син ку разагъта: – Цæуæн Дигори коммæ фонс искæнунмæ! Дууадæсемæй ку рарастæнцæ æ фæдбæл. Уæд уалæ мæгур зæронд лæг дигорон галуæрдуни ку рацæуй Дигорæй будурмæ хуар ласунмæ. Коми думæгмæ ку рахъæрттæй, уæд ку ниссагъæс кодта: – Кæбæлти мин хæстæгдæр уодзæнæй над? Сау гъæдæбæл имæ ку фæккастæй хæстæгдæр æма ку рарастæй сау гъæди астæути. Уæд далæ сау гъæди астæу бæхгинтæ ку ниууидта: – Æллæх, цæмæй фæттарстæн, йе мæбæл ку æрцудæй! Уайтагъддæр Туйгъанти къулух Æсмалий ку рафæсмардта. Æ еуæхстон топп уæрдунæй ку исиста æма 'й хъамилти ку банимахста. Уæд йимæ сæ хестæртæ ку исхъæрттæнцæ. – Дæ фæндаг раст, зæронд лæг, – ку исдзурдтонцæ. – Уæ гъуддаг раст, – ку равардта зæронд лæг æ дзуапп. – Дæ галтæ исуæгъдæ кæнæ, зæронд лæг, – зæгъгæ имæ ку исдзурдтонцæ бабæй. – Уæ, еунæг Хуцауи хатир бакæнтæ æма мин мæ галтæ ма есетæ! Мæ сувæллæнттæ ма цæмæй фæддардзæнæн? Йетæ бабæй дзорунцæ: – Фонсгин адæм айтæ,Дигорæ! Уони ци гъоцитæ низзадæй, йетæ бабæй низзайдзæнæнцæ галгъæдтæ, йетæ дин исгалтæ уодзæнæнцæ, æма си косдзæнæ. Уæд сæ кæстæртæй еу-дууæ ку æрлæуирдтонцæ æма ин æ галтæ ку фæууæгъдæ кодтонцæ, и æрдтæ бæрзондгомау исесгæй ку æргæлстонцæ. Мæгур зæронд лæг размæ ку бахаудтæй. – Æллæх! Ци уин кодтон, цæмæн мæ рамардтайтæ, – зæгъгæ, фæгъгъæр кодта. Цæй, мæнæй фæгъгъæуæнтæ, сумахбæл бафтуйæнтæ! Йæ галтæ ку фæттардтонцæ, сæ фæдбæл æдзинæгæй ку кастæй. Уæд ку фæггæпп кодта æма æ еуæхстон топп ку æрбайста. Разæвгæрдгæ сæ ку расурдта. Уæд Тугъанти къулух Æсмали æ бæхбæл ку рарæхстæй æма фун ку рауидта, йе 'мбæлттæмæ ку дзурдта: – Йа, уæй-уæй, фесавдан æма ин æ галтæ рауадзæн! Нæ раз нин ку равгарста, сау хæрæмегъи буни фæцан æма нæ кæрæдзей ку нæбал уидтан. Гъейтт! Цæмæй тæрсис, Туйгъани-фурт? Ци нин ракæндзæнæй уалемæй? Уотемæй Æсмалимæ ку нæ байгъустонцæ. Уæд и зæронд лæг ку исбадтæй сæ размæ. Ку имæ нихъхъæрдтæнцæ, уæд сæ йеу къæрах ку фæккодта; йеци йеу къæрахи си дууæ ку æрхаудтæй. Йеу ма дæр æма йеу ма дæр ма... – Дæ мадæ, дæ фиди хатирæй ди корæн, зæронд лæг, æма нæ ниууадзæ! – Гъейтт! Цæмæй тæрсетæ, Курттати фæсевæд! Сумах ци маддæлтæ низзадæй, йетæ бабæй фæйнæ лæхъуæни низзайдзæнæнцæ æма уæд йетæ Дигоргоммæ фонс кæнунмæ некæд бал æрбацæудзæнæнцæ. Туйгъанти къулух Æсмалий ма ку ниууагъта, йе фæдеси ку рандæй Курттатæмæ. Мæйрохс æхсæви сæ мæрдтæ ку бафснайдтонцæ. Рохсаг, рохсаг фæууæд Гуйман. Нæ Дигорæмæ уæхæнттæ берæ игурæд!
Радзырдта йæ Цориты Хасан, 7 июль, 1931 аз. Цыкола. ЦИГСИИ-йы архив, фольклор № 111, папкæ 89, ф. 56–57.
Ирон адæмон сфæлдыстад. Дыууæ Томы. Фыццаг том. / Сарæзта йæ Салæгаты З. – Дзæуджыхъæу: Ир, 2007 – 719 ф.
при использовании материалов сайта, гиперссылка обязательна |