ИРЫСТОНЫ ПОЭЗИ
ЧИНЫГ САРÆЗТА ÆМÆ ЦЫБЫР БИОГРАФИОН ЗОНÆНТÆ НЫФФЫСТА ХЪОДЗАТЫ ÆХСАР. 2012 АЗ
Год издания: 2012
Формат: djvu
==========================
ЦЫБЫР РАЗНЫХАС
Нæ профессионалон поэзи куы фæзынд, ууыл 120 азæй фылдæр цæуы, фæлæ нæм абоны онг нывыл антологи нæма ис. Уæвгæ къорд хатты рацыд, иуцасдæр нæ литературæйы цæсгом чи æвдыста, ахæм чингуытæ: «Осетинская литература» (Москва, издательство «Художественная литература», 1952), «Ирон советон литературæ» (Орджоникидзе, 1954), «Антология осетинской поэзии» (Москва, издательство «Художественная литература», 1960), «Ирон поэзийы антологи», I, II томтæ, Цхинвал, 1969, 1970), «Антология осетинской поэзии» (Орджоникидзе, 1984).
Ацы чингуытæ джиппы уагъд цыдысты алыхуызон бæрæгбæттæм (Ирон литературæйы бонтæ Мæскуыйы, Цæгат Ирыстоны автономийы 30 кæнæ 60 азы æмæ а. д.), уымæ гæсгæ нæ литературæйы цæсгом нывыл не ’вдыстой. Сæ аразджытæ æмæ редактортæ фыццаджыфыццаг хъуыды кодтой, уацмыстæ коммунистон догмæты аккаг сты æви нæ, ууыл. Литературæйы бындур дзырдаивад кæй у, идеологийы къуындæг фæлгæтты йын тъыссæн кæй нæй, уыдæттæ ницæмæ дардтой Системæйы сæрхъызойтæ æмæ сæ коммæгæс фæсдзæуинтæ. Æмæ-иу æцæг уацмыстæ арæх иуварс аззадысты, сæ бынат та сын-иу бацахстой мæнг ницытæ ’мæ мацытæ.
Ацы дунейыл алцæмæй æххæст ничи у æмæ ницы у. Нæ антологи дæр, æвæццæгæн, æнæаипп нæ уыдзæни, чи зоны, æгæр субъективон цæстæй æркастыстæм нæ поэзимæ, зæгъгæ, нæм хъуамæ ахæм фау дæр æрхастæуа. Рагацау ыл сæттын: æцæгдæр, мæхæдæг иу удæй аккагдæрыл кæй нымадтон, уыцы уацмыстæ æвзæрстон чиныг аразгæйæ. Кæд æндæр искæй зæрды æрæфта ног, хæрзхъæддæр антологи саразын, уæд — йæ хъуыддаг раст!
(Хъодзаты Æхсар)